Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 380 Hüküm no: 372 Orijinal metin no: [89b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gürcü asıllı köle Şahbaz’ın, sahibi Hanioğlu Ahmed Beşe’ye itaat etmesi gerektiği Vilâyet-i Anadolu’da Çıldır sancağında Oltu nâm kasabada sâkin Hanioğlu demekle ma‘rûf Ahmed Beşe b. Mehmed tarafından husûs-ı âti’l-beyana ber-vech-i âtî iddi‘âyı vekâlet eden işbu bâ‘isü’l-kitâb Ali Bey b. İslâm nâm kimesne mahmiye-i İstanbul’da meclis-i şer‘-i hatîrde işbu orta boylu gök elâ gözlü sarı kaşlı, Gürciyü’l-asl Şahbaz b. Abdullah nâm şâbb-ı emred mahzarında bi’l-vekâle üzerine da‘vâ ve takrîr-i kelâm edip işbu mevsûf-ı mezbûr Şahbaz’ı müvekkilim mezbûr Ahmed Beşe bundan akdem Derviş Ağa oğlu Osman Ağa’dan rıkkını mu‘terif ve rıkka inkıyâdı olduğu hâlde doksan beş guruş semen-i medfû‘a iştirâ ve kabz etmekle mülk-i müşterâsı oldukdan sonra rıkkıyet üzere müvekkilim mezbûra hizmet üzere iken târîh-i kitâbdan bir sene mukaddem mezbûrun mülkünden firâr ve ibâk etmekle mezbûr Ahmed Beşe mevsûf-ı mezbûru zafer bulduğum mahâlde ahz u kabza ve kendüye îsâle ve bunlar mütevakkıf olduğu umûrun küllîsine tarafından beni vekîl, ben dahi kabûl etmeğin hâlâ mevsûf-ı mezbûra suâl olunup takrîri tahrîr ve müvekkilim mezbûra rıkka inkıyâda tenbîh olunmak matlûbumdur dedikde gıbbe’s-suâl mevsûf-ı mezbûr Şahbaz cevâbında ben vilâyet-i mezbûrede Erzurum sancağında Baruz? nâm karyeden re‘âyâ evlâdı ve hürrü’l-asl olup aslen ebeveynime rık târî olmamıştır deyü iddi‘â-yı hürriyet etdiğinden mâ‘adâ müvekkil-i mezbûr Ahmed Beşe’ye rıkkıyet üzere hizmet eylediğini bi’l-külliye inkâr edicek evvelâ mevsûf-ı mezbûrdan hürriyetine beyyine taleb olundukda ityân-ı beyyine için istimhâl etmekle birkaç def‘a mehl-i şer‘î ile imhâl olunup müddet-i mehil tamâm ve mevsûf-ı mezbûr bir vechile ikāmet-i beyyine edemeyip izhâr-ı acz eylediğinden sonra sâniyen müdde‘î-i mezbûrdan vekâletine ve mevsûf-ı mezbûr rıkka inkıyâd üzere müvekkil-i mezbûra hizmet eylediğine beyyine taleb olundukda udûl-i Müslimînden olup zikr olunan Oltu kasabası ahâlîsinden olmağla mahmiye-i mezbûrede Dergâh-ı âlî yeniçerileri ağası kapısında sâkin İsmail b. Ali ve Sarrâchane kurbünde sâkin Mahmud b. Şahin nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka mezbûr ahmed Hanioğlu Ahmed Beşe b. Mehmed abd-i memlûkü olan işbu mevsûf-ı mezbûr Şahbaz’a zafer bulduğu mahâlde ahz u kabza ve kendüye îsâle ve bunların mütevakkıf olduğu umûrun küllîsine tarafından müdde‘î-i mezbûru bizim huzûrumuzda [90a] vekîl edip, ol dahi kabûl eylediğinden mâ‘adâ müvekkil-i mezbûr mevsûf-ı mezbûru zikr olunan Oltu kasabasında sâkin Derviş Ağa oğlu Osman Ağa’nın yedinde abd-i memlûkü olup rıkkını mu‘terif ve rıkka münkād olduğu hâlde doksan beş guruş semen-i medfû‘a iştirâ etmekle biz bu vech üzere müdde‘î-i mezbûr, mezbûr Hanioğlu Ahmed Beşe’nin vekîl ve mevsûf-ı mezbûr müvekkil-i mezbûra rıkkıyet üzere hizmetde iken târîh-i kitâbdan bir sene mukaddem mülkünden firâr ve ibâk eylediğine şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince mevsûf-ı mezbûr rıkkıyet üzere müvekkil-i mezbûra hizmete tenbîh olunup vekîl-i mezbûra teslîm birle mâ vaka‘a bi’t-taleb ketb olundu. Fi’l-yevmi’l-hâmis aşer min-Cumâdelûlâ li-sene sitte aşere ve mi’e ve elf. Şuhûdü’l-hâl: Hüseyin Efendi el-kādı, İsmail Efendi el-kâtib, Ali Çavuş b. Mehmed, Mustafa b. Halil, Hasan Çelebi b. Abdullah, Abdurrahman Mirza, Ahmed b. Osman, İbrahim b. Abdullah, el-Hâc Yusuf b. Osman.