Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 381 Hüküm no: 373 Orijinal metin no: [90a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Bey’in Hasan Çelebi’de olan alacağının tahsil olunması Mahmiye-i İstanbul’da Mollagürânî mahâllesinde sâkin İsmail Bey b. Ahmed mahmiye-i mezbûrede meclis-i şer‘de yine mahâlle-i mezbûrede Sarı Nasuh mahâllesi sâkinlerinden Hasan Çelebi b. Himmet nâm kimesne mahzarında üzerine da‘vâ ve takrîr-i kelâm edip mezbûr Hasan Çelebi zimmetinde cihet-i karz-ı şer‘den altmış guruş hakkım olup hâlâ taleb eylediğimde bana edâdan imtinâ‘ eder suâl olunsun dedikde gıbbe’s-suâl mezbûr Hasan Çelebi cevâbında fi’l-hakīka cihet-i mezbûreden müdde‘î-i mezbûra meblağ-ı merkūm altmış guruş zimmetinde deyni olduğunu ikrâr ve i‘tirâf etmeğin mûcebince meblağ-ı merkūm altmış guruşu müdde‘î-i mezbûra edâ ve teslîme mezbûr Hasan Çelebi’ye tenbîh birle mâ vaka‘a bi’t-taleb ketb olundu. Fi’l-yevmi’l-hâmis min-Cumâdelûlâ sene 1116 Şuhûdü’l-hâl: Mustafa Çavuş el-mübâşir, Ebubekir Ağa b. Mustafa, Mehmed Çelebi b. Mahmud, Mehmed Efendi el-kâtib, İsmail Efendi el-kâtib, Ömer Efendi el-kâtib, Veli Efendi el-kâtib, Mehmed Efendi el-kâtib, Mustafa Efendi el-kâtib