Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 381 Hüküm no: 374 Orijinal metin no: [90a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rus asıllı Gülbuy azatlı olduğundan sahiplik iddia eden Osman Ağa’nın kendisini serbest bırakması İşbu uzun boylu açık kumral kaşlı gök elâ gözlü Rusiyyetü’l-asl rıkk-ı sâbıkını mu‘terife bâ‘isetü’l-kitâb Gülbuy bt. Abdullah nâm câriye mahmiye-i İstanbul’da meclis-i şer‘-i hatîrde kendüye rık olmak üzere vâzı‘ü’l-yed olan İbrahim Ağa b. Abdullah tarafından husûs-ı âti’l-beyana vekîl olduğu İsmail b. Halil ve İbrahim b. Mehmed nâm kimesneler şehâdetleriyle sâbit olan Osman Ağa b. Mehmed mahzarında üzerine da‘vâ ve takrîr-i kelâm edip ben bundan akdem mahmiye-i mezbûrede Dülgerzâde mahâllesinde sâkin iken bundan akdem vefât eden Basra Kādısı İsmail Efendi b. ( ) nâm kimesnenin câriye-i memlûkesi olmağla müteveffâ-yı mezbûr İsmail Efendi hayâtında beni târîh-i kitâbdan on dört sene mukaddem malından âzâd ve mülkünden ihrâç edip ben sâir harâir-i asliyât gibi hürre olmuş iken müvekkil-i mezbûr bana bi-gayrı hakkın rık olmak üzere vaz‘-ı yed eder suâl olunup müvekkil-i mezbûr benden kasr-ı yedine tenbîh ve sebîlim tahliye olunmak matlûbumdur dedikde gıbbe’s-suâl vekîl-i mezbûr cevâbında mevsûfe-i mezbûreyi müvekkilim mezbûr İbrahim Ağa bundan akdem işbu hâzır bi’l-meclis İmam Mustafa Efendi b. Ali nâm kimesneden semen-i ma‘lûm-ı medfû‘a rık olmak üzere iştirâ ve tesellüm etmekle mülk-i müşterâsı olmağın ona binâen vaz‘-ı yed eder deyip, vech-i muharrer üzere mevsûfe-i mezbûrenin âzâdlı olduğunu inkâr edicek mevsûfe-i mezbûreden müdde‘âsını mübeyyine beyyine taleb olundukda mahmiye-i mezbûrede Karagümrük kurbünde Hadîce Sultân mahâllesinde sâkin Ahmed b. Yusuf ve Hoca Hayreddin mahâllesinde sâkin Derviş Mehmed Efendi b. Yusuf nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka müteveffâ-yı mezbûr Basra Kādısı İsmail Efendi b. ( ) hayâtında câriye-i memlûkesi olan işbu mevsûfe-i mezbûre Gülbuy’u târîh-i kitâbdan on dört sene mukaddem bizim huzûrumuzda malından âzâd ve mülkünden ihrâç edip sâir harâir-i asliyât zümresine ilhâk ve idrâc etmiş idi, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle oldukdan sonra mûcebince mevsûfe-i mezbûrenin ıtkına ba‘de’l-hükm müvekkil-i mezbûr İbrahim Ağa mevsûfe-i mezbûreden kasr-ı yed etmek üzere vekîl-i mezbûra tenbîh olunup mâ vaka‘a bi’t-taleb ketb olundu. Fi’l-yevmi’s-sâmin aşere min-Cumâdelûlâ li-sene sitte aşere ve mi’e ba‘de’l-elf. Şuhûdü’l-hâl: Hüseyin Efendi el-kâtib, el-Hâc Mehmed Efendi el-kâtib, Emin Mehmed Efendi el-kâtib, Mehmed Efendi el-kādı, el-Hâc Yusuf b. Osman.