Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 382 Hüküm no: 375 Orijinal metin no: [90b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hüseyin’in eşi İbrahim Çelebi’den muhalaa usulüyle boşanması Mahmiye-i İstanbul’da Debbâğ Yunus mahâllesinde sâkine Âişe bt. el-Hâc Hüseyin nâm hatun tarafından husûs-ı âti’l-beyana vekîl olduğu zât-ı mezbûreyi ma‘rifet-i şer‘iyye ile ârifân olan Hasan b. Abdullah ve Molla Yusuf b. Abdullah nâm kimesneler şehâdetleriyle şer‘an sâbit ve sübût-ı vekâletine hükm-i şer‘î lâhık olan Hüseyin Çelebi b. İbrahim nâm kimesne mahmiye-i mezbûrede meclis-i şer‘-i hatîrde müvekkile-i mezbûrenin zevc-i muhâlı‘ı işbu bâ‘isü’l-kitâb İbrahim Çelebi b. Musa nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Âişe’nin zevci merkūm İbrahim Çelebi ile beynlerinde hüsn-i mu‘âşeretleri olmamağla zimmetinde mütekarrir ve ma‘kūdün-aleyh olan dokuz bin akçe mehr-i müeccelinin altı bin akçesini ve beynlerinde ma‘lûm bir çift âbdest küpesi için iki yüz kırk akçe ve bir altın la‘le nişân yüzüğü için dokuz yüz altmış akçeyi zevci mezbûr İbrahim Çelebi yedinden tamâmen ahz u kabz eylediğinden sonra mehr-i müeccelinden bâkī kalan üç bin akçe üzerine ve nafaka-i iddet-i ma‘lûme ve meûnet-i süknâsı dahi kendi üzerine olmak üzere zevci mezbûr İbrahim Çelebi ile muhâla‘a-i sahîha-i şer‘iyye ile muhâla‘a edip her biri hul‘-ı mezbûru ba‘de’l-kabûl hukūk-ı zevciyete müte‘allıka âmme-i da‘vâdan zevci mezbûr İbrahim Çelebi’yi ibrâ ve iskāt edip ve mezbûr İbrahim Çelebi dahi kezâlik müvekkilem merkūm Âişe Hatun’u ibrâ ve iskāt eyledi, fîmâ-ba‘d birbirleriyle aslâ da‘vâ ve nizâ‘ ve husûmetleri kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî 18 min-Cumâdelûlâ sene 1116 Şuhûdü’l-hâl: İmam İbrahim Efendi b. Mustafa, Ali Çelebi b. Osman, Ebubekir Efendi b. Osman, Ali Beşe b. Receb, Mehmed Beşe b. Ali, Salih Çelebi b. Ömer.