Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 383 Hüküm no: 376 Orijinal metin no: [90b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un vasiyetini yerine getirmek üzere Mustafa Efendi’yi vekil tayin etmesi Mahmiye-i İstanbul’da Çıkrıkçı Kemâl mahâllesinde sâkine Fâtıma bt. Abdullah nâm hatun tarafından husûs-ı âti’l-beyana vekîl olduğu zât-ı mezbûreyi ma‘rifet-i şer‘iyye ile ârifân olan Mehmed Efendi b. Mehmed ve Hasan b. Veli nâm kimesneler şehâdetleriyle şer‘an sâbit olan Hasan Beşe b. Hüseyin nâm kimesne mahmiye-i mezbûrede meclis-i şer‘-i hatîrde işbu bâ‘isü’l-vesîka Mustafa Efendi b. Yusuf nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Fâtıma Hatun hâlâ cemî‘ tasarrufât-ı şer‘iyyesi câize ve teberru‘ât-ı mer‘iyesi nâfize olduğu hâlde zevci işbu hâzır bi’l-meclis Osman Beşe b. Malkoç ile mahâlle-i mezbûrede vâki‘ menzilde ma‘an sâkine olmağla emlâkından altı yasdık ve üç minder ve iki beledî döşek ve üç yemenî yorgan ve bir kazgan ve iki tencere ve sekiz sahan ve bir sini ve bir tepsi ve üç sahan kapağı ve bir köhne yan keçesi ve iki köhne kilim ve bir velence ve bir köhne kilim ve bir güğüm ve bir sîm ön kuşağı ve bir tek altın bilezik ve iki köhne sandala kaplı kürk ve üç kaftan ve iki köhne sandal anteri ve beş top bez ve iki gömlek ve üç minder çarşebi ve bir peşkirim olup ben bi-emrillâhi te‘âlâ dâr-ı fenâdan dâr-ı bakāya irtihâl ve intikāl eylediğimde eşyâ-yı mezkûre sûk-ı sultânîde ba‘de’l-müzâyede semen-i misli bey‘ olunup semenin sülüsü ifrâz ve vech-i mesnûn üzere techîz ve tekfînim ve sâir levâzım-ı defnim ve iskāt-ı salâtım görülüp ve eyyâm-ı mu‘tâdede tabh-ı ta‘âm olunup fukarâ-yı Müslimîne it‘âm oluna ve fazla kalırsa mezbûr Mustafa Efendi re’yi ile sâir vücûh-ı birre harc u sarf oluna deyü vasiyet ve tenfîzine işbu mezbûr Mustafa Efendi’yi vasiyy-i muhtâr nasb u ihtiyâr edip ol dahi vesâyet-i mezbûreyi ber-vech-i muharrer ba‘de’l-kabûl bâlâda tahrîr olunan eşyâdan gayrı menzil-i mezbûr içinde mevcûd eşyâda alâka ve medhalim olmayıp mâ‘adâsı zevcim mezbûr Osman Beşe’nin mülk ve hakkıdır deyü nefy-i mülk eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min-Cumâdelûlâ li-sene sitte aşere ve mi’e ve elf. Şuhûdü’l-hâl: Mehmed Efendi b. Musa el-imâm, Mehmed Halîfe b. Mehmed el-müezzin, Hüseyin b. Veli, İsmail Beşe b. Veli, Abdülbaki b. Ahmed.