Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 385 Hüküm no: 379 Orijinal metin no: [91a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe’nin kefaletten dolayı Abdullah Ağa’da olan alacağının tahsili Dergâh-ı âlî yeniçerilerinin yirmi dördüncü cemâ‘atine mahsûs oda neferâtından işbu râfi‘ü’l-vesîka Ahmed Beşe b. İbrahim nâm kimesne mahmiye-i İstanbul’da meclis-i şer‘de Abdullah Ağa b. Mirza nâm kimesne mahzarında üzerine da‘vâ ve takrîr-i kelâm edip gāib ani’l-meclis Gürcistan’da Zoçi? sancağı beyi olan İbrahim Bey b. Mehmed nâm kimesne zimmetinde cihet-i deyn-i şer‘îden işbu yedimde olan memhûr temessük mûcebince bin iki yüz on beş guruş hakkım olmağla meblağ-ı mezbûre merkūm Abdullah Ağa bin yüz on dört senesi Zilhicceti’ş-şerîfesinde tarafeynden emr u kabûlü hâvî kefâlet-i sahîha-i şer‘iyye ile kefil olmağın hâlâ meblağ-ı mezbûru merkūm Abdullah Ağa’dan kefâletine binâen taleb ederim, suâl olunup meblağ-ı mezbûrun alıverilmesi matlûbumdur dedikde, gıbbe’s-suâl ve akībe’l-inkâr, müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden ve Alipaşa-i atik mahâllesi ahâlîsinden Hüseyin Çelebi b. Ramazan ve Ahmed Beşe b. Musa ve İsmail b. Zülfikar nâm kimesneler li-ecli’ş-şehâde meclis-i şer‘e hâzirûn olup isre’l-istişhâd fi’l-hakīka gāib-i mezbûr Zoçi? sancağı beyi olan İbrahim Bey b. Mehmed nâm kimesne zimmetinde müdde‘î-i mezbûrun cihet-i deyn-i şer‘îden yedimde olan memhûr temessük mûcebince bin iki yüz on beş guruş hakkı olmağla meblağ-ı mezbûra merkūm Abdullah bin yüz on dört senesi Zilhicceti’ş-şerîfesinde bizim huzûrumuzda tarafeynden emr u kabûlü hâvî kefâlet-i sahîha-i şer‘iyye ile kefil olmuş idi, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şeriyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm meblağ-ı mezbûru müdde‘î-i merkūma bi-hükmi’l-kefâle edâ ve teslîme mezbûr Abdullah Ağa’ya ba‘de’t-tenbîh mâ-vaka‘a bi’t-taleb ketb olundu. Fî 18 min-Cumâdelûlâ sene 1116 Şuhûdü’l-hâl: Ali Ağa b. Veli, Bayram Beşe b. Mahmud, İsmail Efendi, Mehmed Bey Sarrâc.