Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 386 Hüküm no: 380 Orijinal metin no: [91a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un menzilini Yusuf b. Abdullah ile eşi Fatıma’ya satması Mahmiye-i İstanbul’da Ahaveyn mahâllesi sâkinelerinden olup zâtı Ali b. Mahmud ve Mahmud b. Ahmed nâm kimesneler ta‘rîfleriyle mu‘arrefe olan Âişe bt. İbrahim nâm hatun mahmiye-i mezbûrede meclis-i şer‘de işbu bâ‘iseyi’l-vesîka Yusuf b. Abdullah nâm kimesne ve zevce Fâtıma bt. Abdullah nâm hatun mahzarlarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup mahâlle-i mezbûrede vâki‘ bir tarafdan Fâtıma bt. Mehmed nâm hatun mülkü ve bir tarafdan ulemâya meşrût vakıf menzil ve bir tarafdan Kadınşah nâm hatun mülkü ve taraf-ı râbii tarîk-i âm ile mahdûd fevkānî bir bâb oda ve bir bâb tahtânî oda ve bir tahta-pûş ve bir bi’r-i mâ’ ve kenîfi müştemil mülk menzilimi tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Yusuf ve zevcesi mezbûre Fâtıma doksan guruşa bey‘ ve teslîm onlar dahi ber-vech-i muharrer ale’l-iştirâki’s-seviy iştirâ ve tesellüm ve kabz u kabûl eyledikden sonra semeni olan meblağ-ı [mezkûr] doksan guruşu mezbûr Yusuf ve zevcesi mezbûre Fâtıma bana edâ ve teslîm ben dahi yedlerinden tamâmen ahz u kabz eyledim, fîmâ [ba‘d] menzil-i mahdûd-ı mezkûr mezbûr Yusuf ve zevcesi mezbûre Fâtıma’nın mülk-i müşterâlarıdır, keyfe mâ yeşâ ve yahtâr mutasarrıf olsunlar dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-ışrîn min-Cumâdelûlâ sene 1116 Şuhûdü’l-hâl: el-Hâc Ahmed b. Abdullah, Abdullah b. Abdurrahman, Ali Beşe b. Yakub, Hamza Odabaşı b. Ali, el-Hâc Mehmed b. Receb, Veli Beşe b. Ahmed, el-Hâc Yusuf b. Osman.