Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 386 Hüküm no: 381 Orijinal metin no: [91b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar Halil’in, ortağı Ali’den alacağının tahsili İzmir tüccârından bâ‘isü’l-kitâb el-Hâc Halil b. Mehmed nâm kimesne mahmiye-i İstanbul’da meclis-i şer‘-i hatîrde yine tâife-i mezbûreden el-Hâc Ali b. el-Hâc Sunullah nâm kimesne mahzarında üzerine da‘vâ ve takrîr-i kelâm edip biz mukaddemâ mezbûr el-Hâc Ali ile vücûh-ı ticâretde şerîkler olup bundan akdem fesh-i şirket eylediğimizde medîne-i İzmir’de beynimizde hesâb görüp benim mezbûr el-Hâc Ali zimmetinde iki yüz kırk yedi guruş hakkım zuhûr edip hattâ târîh-i kitâbdan on gün mukaddem mahmiye-i mezbûrede Emir Hanı’nda meblağ-ı merkūmu mezbûr el-Hâc Ali’den taleb eylediğimde ol dahi cevâbında bana zimmetinde ancak yüz kırk guruş deyni olduğunu huzûr-ı Müslimînde ikrâr ve işhâd edip ziyâdesini inkâr etmekle hâlâ ikrârı mertebesi olan meblağ-ı merkūm yüz kırk yedi guruşu mezbûr el-Hâc Ali’den taleb eylediğimde bana edâdan imtinâ‘ eder, suâl olunsun dedikde, gıbbe’s-suâl ve akībe’l-inkâr müdde‘î-i mezbûr el-Hâc Halil’den müdde‘âsına beyyine taleb olundukda udûl-i ahrâr-ı ricâl-i Müslimînden olup han-ı mezbûrda müsâfiren sâkin es-Seyyid Mustafa b. Süleyman ve Molla Hüsrev mahâllesinde sâkin Haffâf el-Hâc Ali b. Abdullah nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka işbu müdde‘î-i mezbûr el-Hâc Halil târîh-i kitâbdan on gün mukaddem mahmiye-i mezbûrede zikr olunan Emir Hanı’nda işbu mezbûr el-Hâc Ali’den sende beynimizde ma‘lûm şirket hesâbından iki yüz kırk yedi guruş hakkım olup meblağ-ı merkūm iki yüz kır[k] yedi guruşu taleb eylediğinde mezbûr el-Hâc Ali dahi sana cihet-i mezkûreden zimmetimde ancak yüz kırk yedi guruş deynim vardır deyü bizim huzûrumuzda ikrâr ve bizi işhâd eyledi, müdde‘î-i mezbûr için meblağ-ı merkūm yüz kırk yedi guruşu mezbûr el-Hâc Ali’den hakk-ı taleb ve ahz vardır, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh mâ-vaka‘a bi’t-taleb ketb olundu. Fî 22 min-Cumâdelûlâ sene 1116. Şuhûdü’l-hâl: Mustafa Efendi el-müezzin, Mustafa Efendi b. Mehmed, İbrahim Efendi b. Mustafa, es-Seyyid Mustafa Çelebi b. Davud, Abdullah Efendi b. Ahmed, Ahmed b. Ali, Ömer b. Hasan, Yahya b. Ali, Mehmed Efendi b. Ahmed