Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 387 Hüküm no: 382 Orijinal metin no: [91b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Adli Mehmed Efendi ve kardeşi Ahmed Ağa’nın çiftlik mahsulünden dolayı olan alacaklarının tahsili Mahmiye-i İstanbul’da ( ) mahâllesi sâkinlerinden olup kendi tarafından asil ve li-ebeveyn er karındaşı Adli Mehmed Efendi b. Süleyman Ağa tarafından husûs-ı âti’l-beyana vekîl olduğu Abdullah b. Mehmed ve Ahmed b. İskender nâm kimesneler şehâdetleriyle sâbit olan işbu râfi‘ü’l-vesîka Ahmed Ağa nâm kimesne mahmiye-i mezbûrede meclis-i şer‘de vilâyet-i Rumeli’nde Gelibolu muzâfâtından Şehirköy kazâsına tâbi‘ Mürefte nâm karye ahâlîsinden iken bunan akdem fevt olan el-Hâc İbrahim b. Osman nâm kimesnenin verâseti zevce-i metrûkesi Fâtıma bt. Hüseyin nâm hatun ile sulbî sagīr oğlu Mustafa’ya ve sulbiye-i kebîre kızları Cennet ve Rukıye’ye münhasıra olduğu şer‘an zâhir ve müte‘ayyin oldukdan sonra mezbûre Rukıye tarafından husûs-ı âti’l-beyana vekîl olduğu Ahmed b. İsmail ve Mehmed b. Abdullah nâm kimesneler şehâdetleriyle sâbit olan sagīr-i mezbûrun tesviye-i umûruna kıbel-i şer‘den mansûb vasîsi olan mezbûre Fâtıma ile mezbûre Cennet mahzarlarında bi’l-asâle ve bi’l-vekâle üzerlerine da‘vâ ve takrîr-i kelâm edip vilâyet-i mezbûrede Evreşe kazâsına tâbi‘ Yapıcılı nâm karyede vâki‘ ma‘lûmü’l-hudûd ve’l-kat‘ çiftliğin üç sehmden iki sehmi benim ile kız karındaşım müvekkil-i mezbûrun ve bir sehmi dahi mûrisleri müteveffâ-yı mezbûrun olmağla iki seneden beri çiftlik-i mezbûrun arazisinde hâsıl olan mahsûlâtından iki yüz keyl mikdârı buğdayı bi’l-cümle verese-i mezbûrdan ahz u kabz etmeleriyle hâlâ suâl olunup çiftlik-i mezbûrda hâsıl olan buğdayın makbûzları olan iki yüz keylin üç sehmden bizim iki sehme isâbet eden buğdayın mevcûd ise aynını müstehlik ise kıymet-i şer‘iyyelerini teslîm etmek üzere verese-i mezbûrûna tenbîh olunmak bi’l-asâle ve bi’l-vekâle matlûbumdur dedikde, gıbbe’s-suâl mezbûretân Fâtıma ve Cennet cevâblarında fi’l-hakīka çiftlik-i mezbûrun üç sehmde iki sehmi müdde‘î-i mezbûr ile karındaşı müvekkil-i mezbûrun olup ve bir sehmi dahi mûrisleri müteveffâ-yı mezbûrun olmağla ve çiftlik-i mezbûrun arazisinde iki seneden beri iki yüz keyl buğday hasıl olup kendileri bi’l-cümle kabz eylediklerini her biri ikrâr ve i‘tirâf etmeğin mûcebiyle makbûzları olan iki yüz keyl buğdaydan ber-vech-i muharrer müdde‘î-i mezbûr ile müvekkil-i mezbûrun iki sehmine isâbet eden buğdayın aynı mevcûd ise aynını, müstehlek ise kıymet-i şer‘iyyesini müdde‘î-i mezbûra teslîm etmek üzere mezbûretân Fâtıma ve Cennet’e tenbîh olunup mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Cumâdelâhire sene 1116. Şuhûdü’l-hâl: Hüseyin b. Cafer, Mustafa b. Ahmed, Ahmed b. İskender, Abdullah b. Mehmed.