Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 388 Hüküm no: 383 Orijinal metin no: [92a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Bey’in Selim Bey’e olan borcunun tecil edilmesi Sâbıkā Üsküp beyi olup mahmiye-i İstanbul’da Sarmaşık mahâllesinde müsâfiren sâkin Hasan Bey b. Ahmed nâm kimesne mahmiye-i mezbûrede meclis-i şer‘de işbu bâ‘isü’l-vesîka Selim Bey b. Zekeriya nâm kimesne mahzarında ikrâr ve takrîr-i kelâm edip mezbûr Selim Bey ile beynimizde nice ahz u i‘tâ ve mu‘âmelât-ı şettâ vâkı‘a olmuş idi, hâlâ târîh-i kitâba gelince beynimizde cereyân eden ahz u i‘tâyı hesâb eylediğimizde yedine verdiğim işbu deyn temessükü mûcebince benim mezbûr Selim Bey’e üç yüz guruş zimmetimde deynim zuhûr edip lâkin meblağ-ı mezbûru âcilen edâya iktidârım olmamağla tecîle tâlib olduğum ecilden mezbûr Selim Bey târîh-i kitâbdan iki yüz güne değin beni tecîl, ben dahi ber-vech-i muharrer kabûl edip bu vech üzere mezbûr Selim Bey’e meblağ-ı mezbûr üç yüz guruş müeccel ve mev‘ûd deynim olup meblağ-ı mezbûr üç yüz guruşdan mâ‘adâ târîh-i kitâba gelince sâir beynimizde vâki‘ olan ahz u i‘tâ ve mu‘âmelât-ı şettâdan her birimiz âharın zimmetini ibrâ-i âm ile ibrâ ve iskāt eyledik dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’-s-sâmin aşer min-Cumâdelâhir sene sitte aşere ve mi’ete ve elf. Şuhûdü’l-hâl: Abdullah Bey b. Ali, İsmail Çavuş b. ( ), Şehri Ali Ağa el-mübâşir, Ali Çelebi b. Ali, Receb Ağa b. Abdullah, Ahmed Ağa b. Abdullah, İbrahim Çelebi yorgancı.