Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 389 Hüküm no: 384 Orijinal metin no: [92a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un eşi Yusuf’u öldürdüğünü iddia ettiği Basmacı Ahmed ile sulh olması Vilâyet-i Anadolu’da Bolu sancağında Zağferanborlusu kasabasında sâkin Kömeç mahâllesi ahâlîsinden kasaba-i mezbûre civârında yaylak yolunda târîh-i kitâbdan üç ay mukaddem mecrûhan fevt olan Yusuf b. Abdullah b. Abdurrahman’ın verâseti zevce-i menkûha-i metrûkesi Âişe bt. <> Ramazan nâm hatun ile sulbiye sagīre kızı Alime’ye münhasıra olduğu şer‘an zâhir ve müte‘ayyin oldukdan sonra zâtı ta‘rîf- şer‘î ile mu‘arrefe olan mezbûre Âişe Hatun kendi asâleten ve sagīre-i mezbûrenin vasiyy-i şer‘îsi olmağla vesâyeten mahmiye-i İstanbul’da meclis-i şer‘-i hatîrde zikr olunan Zağferanborlusu kazâsına tâbi‘ Tokatlıviran nâm karye ahâlîsinden Ali Bey oğlu demekle şehîr bâ‘isü’l-kitâb Basmacı Ahmed b. Mehmed nâm kimesne mahzarında ikrâr ve takrîr-i kelâm edip zevcem mezbûr Yusuf târîh-i mezbûrda mârrü’z-zikr yaylak yolunda göğsünün iki yerinde ve başının bir yerinden bıçak ile darb olunup katîlen fevt olmağla zevcim müteveffâ-yı mezbûru sen cerh ve katleyledin deyü bundan akdem ben asâlet ve vesâyetim hasebiyle mezbûr Basmacı Ahmed’den da‘vâ, ol dahi husûs-ı mezbûru bi’l-külliye inkâr edip mezbûr Basmacı Ahmed kırk günden mütecâviz mahmiye-i mezbûrede sicn-i sultânîde habsolunup ben müdde‘âmı bir vechile isbâta kādir olmayıp ve mezbûr Basmacı Ahmed’in dahi yemîn eylemesi emr-i mukarrer olup sulh sagīr-i mezbûr hakkında dahi her vechile evlâ ve enfa‘ olmağın beynimize muslihûn tavassut edip da‘vâ-i mezkûremden beni mezbûr Basmacı Ahmed ile an-inkâr seksen guruş üzerine sulh eylediklerinde ben dahi sulh[u] asâlet ve vesâyetim hasebiyle kabûl ve bedel-i sulh olan meblağ-ı merkūm seksen guruşu mezbûr Basmacı Ahmed yedinden tamâmen ahz u kabz edip mûrisim müteveffâ-yı mezbûrun dem ü diyetine müte‘allıka âmme-i da‘vâdan bi’l-asâle mezbûr Basmacı Ahmed’in zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fî 23 min-Cumâdelûlâ sene 1116 Şuhûdü’l-hâl: Kırkırık? Hasan Efendi b. Mustafa, Abbas Efendi b. Nimetullah, Sunullah Efendi b. Mehmed, Ahmed Efendi b. Abdullah, İbrahim Beşe b. Mustafa, Abdülbaki b. Ahmed, el-Hâc Yusuf b. Osman.