Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 390 Hüküm no: 385 Orijinal metin no: [92a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah bt. Şaban’ın eşi Ahmed’den muhalaa usulüyle boşanması Mahmiye-i İstanbul’da Sultân Selim Câmi‘-i şerîfi kurbünde Mismârî mahâllesinde sâkine olup zâtını ta‘rîf-i şer‘î ile mu‘arrefe olan Emetullah bt. Şaban nâm hatun mahmiye-i mezbûrede meclis-i şer‘-i hatîr-i lâzımü’t-tevkīrde zevc-i muhâlı‘ı işbu bâ‘isü’l-kitâb Ahmed b. Veli nâm kimesne mahzarında ikrâr-ı tam ve takrîr-i kelâm edip zevcim mezbûr Ahmed ile beynimizde hüsn-i zindegânemiz olmamağla zimmetinde mütekarrir ve ma‘kūdün-aleyh olan üç bin akçe mehr-i müeccelim üzerine ve nafaka-i iddet-i ma‘lûmem ve meûnet-i süknâm dahi kendi üzerime olmak üzere zevcim mezbûr Ahmed ile muhâla‘a-i sahîha-i şer‘iyye ile muhâla‘a edip ve her birimiz hul‘-ı mezbûru ba‘de’l-kabûl hukūk-ı zevciyete ve sâire müte‘allıka âmme-i da‘vâdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik, fîmâ-ba‘d birbirimiz ile aslâ da‘vâ ve nizâ‘ımız kalmadı dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi ve’l-ışrîn min-Cumâdelûlâ sene 1116. Şuhûdü’l-hâl: Mehmed Efendi b. Ahmed, İsmail Efendi el-kâtib, Ali Bey b. Veyis, el-Hâc Yusuf b. Osman.