Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 390 Hüküm no: 386 Orijinal metin no: [92b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un eşi Ahmed Çelebi’den muhalaa usulüyle boşanması Husûs-ı âti’l-beyanın mahâllinde tahrîri iltimâs olunmağın savb-ı şer‘den bi’t-taleb irsâl olunan Sandalcızâde İsmail Efendi mahmiye-i İstanbul’da mi‘mâr Sinan mahâllesinde Âişe Hatun bt. Mehmed’in menziline varıp zeyl-i vesîkada muharrerü’l-esâmi Müslimîn huzûrunda akd-i meclis-i şer‘-i mübîn eyledikde mahâlle-i mezbûrede sâkine olup zâtı Ahmed Efendi b. Hasan ve el-Hâc Hüseyin b. Ahmed nâm kimesneler ta‘rîfleriyle mu‘arrefe olan Emine bt. Ebubekir nâm hatun meclis-i ma‘kūd-ı mezbûrda zevc-i muhâlı‘ı işbu râfi‘ü’l-vesîka Ahmed Çelebi b. Osman nâm kimesne mahzarında ikrâr ve takrîr-i kelâm edip mezbûr Ahmed zevcim olup beynimizde hüsn-i zindegânemiz olmamağla zimmetinde mütekarrir ve ma‘kūdün-aleyh olan <> elli guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere ve bedel-i hul‘ olmak üzere kendüye medfû‘um olan bir çift altın bilezik ve yirmi aded altın düğme ve üç çatmak yasdık ve iki hatâyî kaftan ve bir sincab beden kürkü ve bir orta keçesi ve üç aded yan keçesi cümleten kendinin olmak üzere zevcim mezbûr Ahmed Çelebi ile muhâla‘a-i sahîha-i şer‘iyye ile muhâla‘a edip ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve gayra müte‘allıka âmme-i da‘vâdan her birimiz âharın zimmetini ibrâ ve iskāt eyledik dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahâllinde tahrîr, ba‘dehû ma‘an ba‘s olunan Çukadâr el-Hâc Ali b. Abdullah ve Ali b. Mehmed ile meclis-i şer‘e gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 24 min-Cumâdelûlâ sene 1116 Şuhûdü’l-hâl: Ahmed Efendi b. Hasan el-imâm, Ahmed Efendi b. Receb, el-Hâc Osman b. Mehmed, el-Hâc Hüseyin b. Ahmed el-müezzin, el-Hâc Ali b. Mehmed, Ahmed Beşe b. el-Hâc Hasan, İbrahim Çelebi. b. Kenan, el-Hâc Yusuf b. el-Hâc Mehmed.