Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 391 Hüküm no: 387 Orijinal metin no: [92b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia Hatun’un eşi Ahmed Turabi’den muhalaa usulüyle boşanması Mahmiye-i İstanbul’da Altıpoğaça mahâllesi sâkinelerinden Rabia bt. Mustafa nâm hatun tarafından husûs-ı âti’l-beyana vekîl olduğu zâtını ma‘rifet-i şer‘iyye ile ârifân Sinan Efendi b. Ali ve Mehmed b. Yusuf nâm kimesneler şehâdetleriyle sâbit olan li-ebeveyn karındaşı Ahmed nâm kimesne mahmiye-i mezbûrede meclis-i şer‘de işbu râfi‘ü’l-vesîka Ahmed Turâbî nâm kimesne mahzarında bi’l-vekâle ikrâr ve takrîr-i kelâm edip mezbûr Ahmed müvekkilem mezbûrenin zevci olup lâkin beynlerinde hüsn-i zindegâneleri olmamağla zimmetinde mütekarrir ve ma‘kūdün-aleyh olan altı yüz akçe mehr-i müecceli ve nafaka-i iddet-i ma‘lûmesi üzerlerine ve meûnet-i süknâsı dahi kendi üzerine olmak üzere zevci mezbûr Ahmed ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru ba‘de’l-kabûl hukūk-ı zevciyete müte‘allıka âmme-i da‘vâdan her biri âharın zimmetini ibrâ ve iskāt eyledi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Cumâdelûlâ sene 1116. Şuhûdü’l-hâl: Hüseyin Efendi el-kâtib, Mehmed Efendi b. Ahmed, İbrahim Efendi b. Süleyman, İbrahim b. Mehmed, Hasan b. Musa, Osman b. Ömer.