Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 392 Hüküm no: 389 Orijinal metin no: [92b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci Mehmed ve ortağı Halil’in Hasan b. Hüseyin’i kefillikten çıkarıp zimmetini ibra etmeleri Esirci tâifesinden Mehmed b. Ahmed ve şerîki Halil b. Hasan nâm kimesneler mahmiye-i İstanbul’da meclis-i şer‘de bâ‘isü’l-kitâb el-Hâc Hasan b. Hüseyin nâm kimesne mahzarında her biri ikrâr ve takrîr-i kelâm edip bizim ber-vech-i iştirâk malımızdan iki kıt‘a deyn temessükü mantûkunca Kızbeyi? demekle ma‘rûf gāib ani’l-meclis Mehmed Bey zimmetinde bin sekiz yüz guruş hakkımız olup ve meblağ-ı merkūma işbu mezbûr el-Hâc Hasan ile gāibûn ani’l-meclis Çorbacı Mehmed Ağa ve Ali Çelebi ve Murad Ağa nâm kimesneler her biri alâ-hıdetin emr u kabûlü hâviye kefâlet-i sahîha ile kefil olduklarından sonra meblağ-ı merkūm bin sekiz yüz guruşu asil-i merkūm Mehmed Bey’den ahz ve istîfâ edip bâkī zimmetinde sekiz yüz guruş hakkımız olup meblağ-ı bâkī-i mezbûr sekiz yüz guruşu kefâlet-i mezkûresine binâen bundan akdem mezbûr el-Hâc Hasan’dan taleb ve da‘vâ [93a] etmiş idik el-hâletü hâzihi biz mezbûr el-Hâc Hasan’ı kefâletden ihrâç edip husûs-ı mezbûra müte‘allıka âmme-i da‘vâdan mezbûr el-Hâc Hasan’ın zimmetini ibrâ ve iskāt eyledik. Fîmâ-ba‘d mezbûr el-Hâc Hasan ile husûs-ı mezbûra müte‘allıka aslâ da‘vâ ve nizâ‘ımız kalmadı dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 24 min-Cumâdelûlâ sene 1116. Şuhûdü’l-hâl: İsmail b. Şaban, Hüseyin Çavuş b. Abdullah, Hasan b. Nasuh, Mustafa Çelebi b. Ali, Mehmed Çavuş Tophaneli, Mahmud Efendi b. Ömer, Cafer Ağa b. el-Hâc Osman, Hasan b. Mehmed, Mehmed Ağa b. Mehmed: