Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 392 Hüküm no: 390 Orijinal metin no: [93a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü Anaştaş’ın babası Dimitriyaki’ye borcu olduğunu ikrar etmesi Mahmiye-i İstanbul’da Molla Aşkī mahâllesinde sâkin Anastaş nâm zimmî mahmiye-i mezbûrede meclis-i şer‘-i hatîrde işbu bâ‘isü’s-sifr babası Dimitriyaki v. İstoyko nâm zimmî muvâcehesinde ikrâr ve takrîr-i kelâm edip ben erbâb-ı sanâyi‘den Kürkçü tâifesinden olup mahmiye-i mezbûrede Mahmudpaşa Hanı’nda kürkçülük işlemek vechi üzere odamız olmağla babamız mezbûr Dimitriyaki zikr olunan odada kürkçülük işlemek vechi üzere malından sermâye etmek için bana yüz yirmi beş guruş def‘ ü teslîm ben dahi yedinden ahz u kabz edip zikr olunan handa vâki‘ odada kürkçülük işleyip ve vâlideynimin izin ve rızâlarına muhâlif vaz‘ ü hareket etmemek üzere ta‘ahhüd eyledim bu vech üzere sermâye olmak üzere babam mezbûr Dimitriyaki’ye yüz yirmi beş guruş deynim vardır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi ve’l-ışrîn min-Cumâdelûlâ li-sene sitte aşere ve mi’e ve elf. Şuhûdü’l-hâl: Ahmed b. Abdullah, el-Hâc Ali Beşe, Çukadâr Mehmed Beşe, el-Hâc Yusuf b. Osman, Manol v. Yani, Nikola v. Todori, Yani v. Melkon.