Bab Mahkemesi 54 Numaralı Sicil (H. 1102 / M. 1691) cilt: 20, sayfa: 371 Hüküm no: 451 Orijinal metin no: [79a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. İstirati ile karısı Lamborla bt. Preşkova’nın menzillerini Hacı İbrahim Efendi Vakfı’na satması Mahmiye-i İstanbul’da Abdi Subaşı mahallesinde sâkin Dimitri v. İstirati nâm zimmî ve zevcesi olup zâtı Hasan Çelebi b. Ali ve Mustafa Çelebi b. Osman tarifleriyle mu‘arrefe olan Lamborla bt. Preşkova nâm nasrâniye meclis-i şer‘-i şerîf-i enverde, kendi vakfına meşrûtiyyet üzre bi’l-fi‘il mütevellî olan işbu bâ‘isü’l-kitâb el-Hâc İbrahim Efendi b. Mehmed mahzarında her bir ikrâr-ı tâm ve takrîr-i kelâm edip, yedimizde iştirâk-i seviy üzre mülk ve hakkımız olup mahalle-i mezbûrede vâki‘ bir tarafdan Anton v. Kostantin mülkü ve bir tarafdan Tanaş Reis mülkü ve bir tarafdan cidâr-ı hısn ve bir tarafdan tarîk-i âmla mahdûd fevkānî üç bâb oda ve tahtânî bir bâb oda ve tahta bendi müştemil mülk menzilimizi, bi cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden bey‘-i bâtt-ı kat‘î ile mütevellî-i mezbûr İbrahim Efendi’ye iki yüz guruşa bey‘ ve teslîm, ol dahi vakfı için kendi şartı üzre nukūd-ı vakfla iştirâ ve tesellüm ettiğinden sonra semeni olan meblağ-ı mezbûr iki yüz guruşa mâl-ı vakf-ı mezbûrdan mütevellî-i merkūm yedinden tamâmen ahz u kabz eyledik. Ba‘de’l-yevm menzil-i mezbûrda alâka ve medhalimiz kalmayıp, vakf-ı mezbûr müstagallâtından olmuşdur dediklerinde, gıbbe’t-tasdîki’l-vicâhî mâ vaka‘a bi’t-taleb ve’l-ibtiğā ketb ü imlâ olundu. Fi’l-yevmi’s-sâbi‘ ve’l-ışrîn min Cumâdelâhire li sene isneteyn ve mi’e ve elf. Şuhûdü’l-hâl: Hatîb Ömer Efendi b. Hızır, Mustafa Çelebi b. Mehmed, Mehmed Efendi b. Nasuh, İbrahim Efendi b. ( ), es-Seyyid Mustafa Çelebi b. Mehmed, Hasan Çelebi b. Ali, Mustafa Çelebi b. Osman, İbrahim Çelebi b. Ahmed, Hüseyin Çelebi b. Mehmed, Mahmud b. Hızır.