Bab Mahkemesi 54 Numaralı Sicil (H. 1102 / M. 1691) cilt: 20, sayfa: 372 Hüküm no: 452 Orijinal metin no: [79a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Derviş ile Mustafa Ağa b. Hasan’ın varislerinin Mustafa b. Derviş’in borcu hususunda birbirlerinin zimmetlerini ibra etmesi Mahmiye-i İstanbul’da Pîrî Ağa mahallesi sükkânından iken bundan akdem vefât eden Peyk Mustafa Efendi b. Derviş’in verâseti, zevc-i metrûkesi Rahime ile evlâd-ı sulbiyesi Abdülvehhâb ve Emine ve Fâtıma ve Afife’ye münhasıra olup, ba‘dehû mezbûr Abdülvehhâb dahi fevt olup verâseti vâlidesi İrfan nâm hâtun ile karındaşları mezbûrât Emine ve Fâtıma ve Afife’ye ve li ebeveyn ammizâdeleri Süleyman Efendi ve Ali Ağa ibney Hüseyin Efendi’ye münhasıra olup, ba‘dehû mezbûre Emine dahi fevt olup, verâseti vâlidesi mezbûre İrfan Hâtun’a ve li eb kız karındaşıları mezbûretân Fâtıma ve Afife ve li ebeveyn ammi oğulları mezbûrân Süleyman Efendi ve Ali Ağa’ya münhasıra olup, ba‘dehû mezbûre Fâtıma dahi fevt olup verâseti vâlidesi Ayşe Hâtun bt. Abdullah ile li eb karındaşı mezkûre Afife’ye ve ammi oğulları mezbûrân Süleyman Efendi ve Ali Ağa’ya münhasıra olduğu şer‘an zâhir ve müte‘ayyin oldukdan sonra mezbûrât Rahime ve İrfan ve Ayşe ve Afife taraflarından husûs-ı âti’l-beyâna vekîl olup zâtlarını ma‘rifet-i şer‘iyye ile ârifân el-Hâc Ahmed Ağa b. Abdullah ve Siyavuş b. Abdullah şehâdetleriyle şer‘an vekâleti sâbite olan Ahmed Çelebi b. Mustafa ve mezbûrân Süleyman Efendi ve Ali Ağa taraflarından dahi kezâlik husûs-ı âti’z-zikre vekîl olup yine şâhidân-ı mezbûrân şehâdetleriyle şer‘an vekâleti sâbite olan el-Hâc Mustafa b. Mehmed meclis-i şer‘-i şerîfde, mahmiye-i İstanbul’da Yakub Ağa mahallesinde sâkin iken bundan akdem vefât eden Mustafa Ağa b. Hasan’ın zevcesi işbu bâ‘isetü’l-kitâb Sâliha bt. Abdullah mahzarında her biri ikrâr-ı tâm ve takrîr-i kelâm edip, mezbûr Mustafa Ağa’nın mezkûr Pepek Mustafa Efendi zimmetinde cihet-i deyn-i şer‘îden ba‘de külli’l-hesâb hakkı olan iki bin dört yüz yirmi üç guruşa kable’l-ahz mezbûr Mustafa Ağa vefât ettikden sonra mezbûre Sâliha Hâtun meblağ-ı mezbûrdan zevci merkūmdan ve ba‘de vefâtihî vefât eden sadrî evlâdından ber-mûceb-i hüccet-i şer‘iyye bi tarîki’l-münâsaha kendiye isâbet eden seksen beş bin yedi yüz üç akçeyi bizden taleb eyledikde, biz dahi mezbûre Sâliha’nın gāib ani’l-meclis Hüseyin Ağa müdde‘iye-i mezkûre Sâliha tarafından hisse-i irsiyesini bizden taleb ve da‘vâ ve ahz u kabz ve îsâle vekîl olmağla hisse-i mezbûreyi bi’t-tamâm mezbûr Hüseyin Ağa’ya vermişdik deyip lâkin husûs-ı mezbûru isbât edememekle, mezbûre Sâliha’ya yemîn verilip hisse-i mezbûresi kendiye teslîm olunmak üzre hüküm ve hüccet-i şer‘iyye verildikden sonra biz merkūme Sâliha’ya üç yüz guruş teslîm, ol dahi ahz u kabz edip ve ziyâdesinden verese-i müteveffâ-yı mezbûru ibrâ etmekle, biz dahi merkūme Sâliha’nın zevci mezkûr Hüseyin Ağa’ya medfû‘umuz olan meblağa müte‘allika âmme-i da‘vâdan mezbûr Hüseyin Ağa’yı ibrâ-i âmm-ı kātı‘ü’n-nizâ‘la ibrâ ve iskāt eyledik. Ba‘de’l-yevm mezbûra Sâliha ve zevci mezkûr Hüseyin Ağa ile aslâ ve kat‘â da‘vâ ve nizâ‘ımız kalmamışdır dediklerinde, gıbbe’t-tasdîki’ş-şer‘î mâ hüve’l-[vâki‘] bi’t-taleb ketb olundu. Fi’l-yevmi’l-hâmis ve’l-ışrîn [79b] min Cumâdelâhire li seneti isneteyn ve mi’e ve elf. Şuhûdü’l-hâl: El-Hâc Ahmed Ağa b. Abdullah, Siyavuş Ağa b. Abdullah, Mehmed Efendi b. Mustafa, Hasan Efendi b. Mustafa, Hasan Efendi b. Hasan, Solakzâde Mustafa Çelebi b. Mehmed.