Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 393 Hüküm no: 392 Orijinal metin no: [93a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Mehmed ile kardeşi Rabia’nın vakıf menzillerini Hüseyin b. Yakub’a satmaları Mahmiye-i İstanbul’da Mimarsinan mahâllesi sâkinelerinden Havva bt. Mehmed nâm hatun ile li-ebeveyn karındaşı Rabia nâm hatun tarafından husûs-ı âti’l-beyana vekîl olduğu zâtlarını ma‘rifet-i şer‘iyye ile ârifân Şaban b. Abdullah ve Yusuf b. Mustafa nâm kimesneler şehâdetleriyle sâbit olan Hüseyin Ağa b. Abdurrahman nâm kimesne mahmiye-i mezbûrede meclis-i şer‘de işbu râfi‘ü’l-vesîka Hüseyin b. Yakub nâm kimesne mahzarında her biri bi’l-asâle ve bi’l-vekâle ikrâr ve takrîr-i kelâm edip arsasının senede bir mikdâr İsmail Ağa Vakfı’na ve bir mikdâr Molla Ahi Vakfına mukāta‘a-i ma‘lûme-i kadîmesi olup mahâlle-i mezbûrede vâki‘ bir tarafdan Bayram Efendi menzili ve bir tarafdan Fedayizâde tasarrufunda olan vakıf bahçe ve bir tarafdan kendi menzilleri ve bir tarafdan tarîk-i âm ile mahdûd ve fevkānî ve tahtânî bir bâb oda ve bir mikdâr havluyu müştemil mülk menzili tarafeynden îcâb ve kabûlü hâvî bey‘-i kat‘î ile mezbûr Hüseyin’e yüz yirmi guruşa bi’l-asâle ve bi’l-vekâle bey‘ ve teslîm, ol dahi iştirâ ve tesellüm ve kabûl eyledikden sonra semeni olan meblağ-ı mezbûru tamâmen yedinden ahz u kabz eyledik. Ba‘de’l-yevm menzil-i mahdûd-ı mezbûr merkūm Hüseyin’in mülk-i müşterâsı olmuşdur, keyfe mâ yeşâ ve yahtâr mutasarrıf olsun dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Cumâdelûlâ li-sene sitte aşere ve mi’e ve elf. Şuhûdü’l-hâl: İsmail Efendi el-kādı, Mehmed Efendi b. ( ), Ömer Efendi b. ( ), el-Hâc Mustafa b. Hasan.