Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 394 Hüküm no: 393 Orijinal metin no: [93b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Yusuf’un eşyalarının varisi Ömer Çelebi’ye teslim edilmesi Mahmiye-i İstanbul’da Molla Şeref mahâllesi sâkinlerinden olup ber-vech-i âtî verâset iddi‘â eden işbu râfi‘ü’l-vesîka Ömer Çelebi b. el-Hâc Ahmed nâm kimesne mahmiye-i mezbûrede meclis-i şer‘de mahâlle-i mezbûre sâkinelerinden Hacce Fâtıma bt. el-Hâc Mehmed nâm hatun tarafından husûs-ı âti’l-beyana vekîl olduğu Abdi Çelebi b. el-Hâc Mehmed ve Ali Çelebi b. İsmail nâm kimesneler şehâdetleriyle şer‘an sâbite olan Mehmed Efendi b. el-Hâc Mustafa mahzarında üzerine da‘vâ ve takrîr-i kelâm edip mahâlle-i mezbûre ahâlîsinden olup bundan akdem Şam-ı şerîf’de fevt olan el-Hâc Yusuf b. Abdullah nâm kimesne benim babam el-Hâc Ahmed’in babası el-Hâc Mehmed b. Ali bin Abdullah nâm kimesnenin mu‘takı olup müteveffâ-yı mezbûr el-Hâc Yusuf’un verâseti min-ciheti’l-usûbeti’s-sebebiye ancak bana münhasıra olup benden gayrı vârisi ve terekesine müstahıkk-ı âhar kimesne olmamağın müteveffâ-yı mezbûr el-Hâc Yusuf bundan akdem Şam-ı şerîf’e gider oldukda müvekkile-i mezbûre Hacce Fâtıma Hatun’a eşyâsından iki mukaffel sandık içinde mevcûd en‘âm-ı şerîf ve üç çakşır ve bir kavuk ve bir sîm kebîr bıçak ve bir beyaz kerrâke ve üç tesbîh ve iki makreme ve beş peşkûnu ve elli sekiz aded yağlık ve göbek misk ve bir sagīr tas ve yedi aded fağfûrî fincân ve beş aded sagīr lengeri ve üç havlu makreme ve bir alaca fetâvâyi ve dört gömlek ve iki gömlek işi ve dört köhne sarık ve bir cedîd sarık ve iki kahve ibriği ve bir şamdân ve üç fener ve iki kavuk ve bir kırmızı çuka kesme ve bir meneviş çuka dolama ve bir kırmızı çuka dîvân dolaması ve iki zıbın ve iki çakşır ve iki şerbetî makreme ve üç sarık ve bir kırmızı mukaddem kuşak ve üç beyaz sâde ve bir cedîd sâde ve bir yeşil sipâh dolaması ve bir tas ve bir cüzdan ve bir sîm yeniçeri keçesi ve iki yasdık ve bir yorgan-ı eşrefî ve tuğrâlı ve Macar ve Engürüs altını cedîd akçe ve para ve eski guruş ve zolota ve bi’l-cümle mahlût dört yüz on guruşunu alâ tarîkı’l-emâne yedine îdâ‘ ve teslîm ol dahi istîdâ‘ ve tesellüm etmekle hâlâ eşyâ-yı mezkûre ile meblağ-ı mezbûru müvekkile-i mezbûre Hacce Fâtıma’dan taleb ederim suâl olunup eşyâ-yı mezkûre ile meblağ-ı mezbûru müvekkile-i mezbûre bana teslîm etmek üzere vekîl-i mezbûra tenbîh olunmak matlûbumdur dedikde gıbbe’s-suâl vekîl-i mezbûr cevâbında fi’l-hakīka müteveffâ-yı mezbûr el-Hâc Yusuf bundan akdem Şâm-ı şerîf’e gider olduğu hâlde eşyâ-yı mezkûre ile meblağ-ı mezbûru müvekkile-i mezbûre Hacce Fâtıma’ya îdâ‘ ve teslîm eylediğini ikrâr lâkin ber-vech-i muharrer müdde‘î-i mezbûrun verâsetini inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup mahâlle-i mezbûre ahâlîsinden İmam İbrahim Efendi b. Hüsrev ve el-Hâc Mustafa b. İbrahim ve müezzin Abdi Çelebi b. Mehmed ve Mahmud b. Abdullah nâm kimesneler li-ecli’ş-şehâde meclis-i şer‘e hâzirûn olup isre’l-istişhâd fi’l-hakīka müteveffâ-yı mezbûr el-Hâc Yusuf b. Abdullah müdde‘î-i mezbûr Ömer Çelebi’nin babası el-Hâc Ahmed’in babası el-Hâc Mehmed b. Ali b. Abdullah’ın mu‘takı olup müteveffâ-yı mezbûr el-Hâc Yusuf’un verâseti min-ciheti’l-usûbeti’s-sebebiye ancak mezbûr Ömer Çelebi’ye münhasıra olup andan gayrı vârisi ve terekesine müstahıkk-ı âhar kimesne olduğu ma‘lûmumuz değildir, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle müdde‘î-i mezbûrun verâsetine ba‘de’l-hükm eşyâ-yı mezkûre ile meblağ-ı mezbûru müvekkile-i mezbûre merkūm Ömer Çelebi’ye teslîm etmek üzere vekîl-i mezbûra tenbîh olunup mâ vaka‘a bi’t-taleb ketb olundu. Fî 27 min-Cumâdelûlâ sene 1116. Şuhûdü’l-hâl: Mahmud Odabaşı b. Mehmed, Hüseyin Beşe b. Ali, Abdi Çelebi b. el-Hâc Mehmed, Ali Çelebi b. İsmail.