Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 396 Hüküm no: 395 Orijinal metin no: [94a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebubekir Ağa’nın mirasdan dolayı Fatıma bt. Ahmed’de olan alacağını tahsil etmesi Mahmiye-i İstanbul’da el-Hâc Ferhad mahâllesinde sâkine iken bundan akdem fevt olan Canfeda bt. Abdullah nâm hatunun verâseti sulbiye kebîre kızı Fâtıma bt. Ahmed nâm hatun ile kendüyü i‘tâk eden Mahmud Efendi’nin sulbî kebîr oğlu Ebubekir Ağa’ya münhasıra olduğu şer‘an zâhir ve müte‘ayyin oldukdan sonra mezbûr Ebubekir Ağa mahmiye-i mezbûrede meclis-i şer‘de tereke-i müteveffâ-yı mezbûre vâzı‘atü’l-yed olan râfi‘atü’l-vesîka mezbûre Fâtıma tarafından husûs-ı âti’l-beyana vekîl olduğu ve el-Hâc Mustafa b. Abdullah nâm kimesneler şehâdetleriyle sâbit olan zevci Mehmed bin Ali nâm kimesne mahzarında ikrâr ve takrîr-i kelâm edip mûrisimiz müteveffâ-yı mezbûrun ancak muhallefâtı yüz yirmi guruş olup hayâtında mezbûre Canfeda sülüsünü techîz ve tekfîn ve sâir masârıf-ı defnine vasiyet etmekle ber-mûceb-i vasiyet meblağ-ı mezbûrun kırk guruşu harc u sarf olundukdan sonra bâkī seksen guruş kalmağın hâlâ müvekkile-i mezbûre Fâtıma meblağ-ı bâkī-i mezbûrdan benim hisseme isâbet eden kırk guruşu bana def‘ ü teslîm ben dahi yedinden ahz u kabz eylediğimden sonra tereke-i müteveffâ-yı mezbûra müte‘allıka âmme-i de‘âvî ve kâffe-i mutâlebâtdan ben müvekkile-i mezbûre Fâtıma’nın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim, ol dahi ber-vech-i muharrer benim zimmetimi ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Cumâdelûlâ sene sitte aşere ve mi’e ve elf. Şuhûdü’l-hâl: Es-Seyyid Mehmed b. Mehmed, Uzun Ahmed b. Hasan, el-Hâc Halil b. Mehmed, Tuzcu Mehmed b. Mehmed, Şeyh Ahmed Efendi b. ( ) Mehmed Çelebi b. Süleyman, Ahmed Çelebi b. Mehmed.