Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 405 Hüküm no: 409 Orijinal metin no: [97a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa’nın vakıf menzilini Mustafa Efendi’ye satması Husûs-ı âti’l-beyanı mahâllinde ketb ü tahrîr için savb-ı şer‘den bi’t-taleb mezûnen irsâl olunan es-Seyyid Ahmed Efendi b. es-Seyyid Mustafa Efendi mahmiye-i İstanbul’da Acemağa mahâllesinde sâkin hâlâ masraf?-ı şehriyârî olan umdetü erbâbi’t-tahrîr ve’l-kalem Mustafa Efendi b. el-Hâc Ebubekir’in menziline varup zeyl-i vesîkada muharrerü’l-esâmi Müslimîn huzûrlarında akd-i meclis-i şer‘-i nebevî eyledikde mahmiye-i mezbûrede Firuzağa mahâllesinde sâkin el-Hâc İbrahim Ağa b. Hasan nâm kimesne meclis-i ma‘kūd-ı mezkûrda işbu sâhibü’l-kitâb mûmâ-ileyh Mustafa Efendi b. el-mezbûr el-Hâc Ebubekir mahzarında ikrâr ve takrîr-i kelâm edip arsasının senede merhûm Nuri Dede Vakfı’na bin sekiz yüz akçe mukāta‘a-i kadîmesi ve üzerinde olan ebniyesi akd-i âti’z-zikrin sudûruna değin silk-i mülkümde münselik olup mârrü’z-zikr Firuzağa mahâllesinde vâki‘ bir tarafdan İbrahim Paşazâde Ali Bey mülkü ve bir tarafdan Nasuh Paşazâde mülkü ve bir tarafdan Mumcubaşı İshak Ağa mülkü ve bir tarafdan ba‘zan Dellâke Şehbaz Hatun mülkü ve ba‘zan tarîk-i âm ile mahdûd dâhiliyede fevkānî iki bâb oda ve bir kebîr sofa ve bir kenîf ve tahtânî iki bâb oda ve hamam ma‘a câmekân ve bir matbâh ve bir kilâr bir köşk sofası ve fırın ve eşcâr-ı müsmire ve gayr-ı müsmireli bahçe ve mezbûre Şehbaz Hatun ile müşterek pınar ve havluyu ve hâriciyede fevkānî üç bâb oda [97b] ve bir sofa ve tahtânî bir bâb oda ve pınar ve ahır ve ambar ve samanlık ve fevkānî ve tahtânî iki kenîfi müştemil menzilimin ebniye-i memlûkesini bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile iki bin dokuz yüz guruşa mûmâ-ileyh Mustafa Efendi’ye bey‘ ve temlîk ve teslîm ve arsasını dahi bâ-ma‘rifet-i mütevellî-i vakf-ı mezbûr merkūma meccânen ferâğ ve tefvîz ol dahi ber-vech-i muharrer iştirâ ve temellük ve tesellüm ve tefvîz eyledikden sonra semen-i mezbûr iki bin dokuz yüz guruşu merkūm Mustafa Efendi yedinden tamâmen ahz u kabz eyledim, fîmâ-ba‘d menzil-i mahdûd-ı mezkûrun ebniye-i memlûkesi mûmâ-ileyh Mustafa Efendi’nin mülk-i müşterâsı ve arsası dahi dâhil-i havza-i tasarrufu olup benim kat‘â alâka ve medhalim kalmadı, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î vâki‘ hâli mevlânâ-yı mezbûr es-Seyyid Ahmed Efendi mahâllinde ketb ü tahrîr edip ba‘dehû ma‘an ba‘s olunan Mustafa b. Ahmed ve Mehmed b. Abdullah ile meclis-i şer‘e gelüp alâ-vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâdis min-Cemâziyelâhire li-sene sitte aşere ve mi’e ve elf. Şuhûdü’l-hâl: el-Hâc Mehmed Ağa b. Ahmed, İshak Ağa b. Yakub, Ali Ağa b. Hüseyin, Mehmed Efendi b. Mehmed el-imâm, Mehmed Ağa b. Abdülkadir, İbrahim Çelebi b. Ebubekir, Abdullah Çelebi b. Muharrem.