Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 406 Hüküm no: 410 Orijinal metin no: [97b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülkadir Efendi b. Ebubekir b. Ömer’in Vakfının tescili El-hamdü li-veliyyihî ve’s-salâtü alâ-nebiyyihî Muhammedin ve âlihi ve sahbihî ecma‘în. Ammâ ba‘d işbu kitâb-ı sıhhat-nisâbın imlâ ve inşâsına bâ‘is ü bâdî olup mahmiye-i İstanbul’da Molla Zeyrek Câmi‘-i şerîfi imamı ve mahâlle-i mezbûrede sâkin sâhibü’l-hayrât ve’l-hasenât Abdülkadir Efendi b. Ebubekir b. Ömer mahmiye-i mezbûrede meclis-i şer‘-i şerîf-i Ahmedî ve mahfil-i dîn-i münîf-i Muhammedî’de vakf-ı âti’z-zikre li-ecli’t-tescîl mütevellî nasb u ta‘yîn eylediği Mustafa Efendi b. eş-Şeyh Mehmed Efendi mahzarında bi’t-tav‘i’s-sâf ikrâr u i‘tirâf edip zikr olunan Molla Zeyrek mahâllesinde vâki‘ arsasının Ayasofya-i kebîr Vakfı’na senede altmış akçe mukāta‘a-i kadîmesi bir tarafdan Nasuh Efendi b. Abdullah mülkü ve bir tarafdan Hadîce Hatun mülkü ve bir tarafdan Pîrî Ağa Câmi‘-i şerîfi imamı Ahmed Efendi menzili ve bir tarafdan tarîk-i âm ile mahdûd hâriciye ve dâhiliye büyût-ı adîdeyi müştemil olup süknâsı merhûm el-Hâc Mustafa nâm sâhibü’l-hayrın Zeyrek Câmi‘-i şerîfi’nde imam olanlara meşrût vakfı olup bin yüz dört senesi Şevvâli’nde vâki‘ harîkde ebniye-i mezkûre bi’l-külliye muhterik ve arsa-i sırfe kalıp taraf-ı vakıf da müceddeden binâya müsâ‘ade olmamağla izn-i hâkimü’ş-şer‘le ben malım ile mülküm olmak üzere arsa-i merkūme-i mezbûre üzerine müceddeden dâhiliye bir bâb fevkānî oda ve bir sofa ve dehliz ve kenîf ve tahtânî bir matbâh ve kilâr ve mağsel ve bahçe ve havluyu ve hâriciye iki bâb fevkānî oda ve tahta-bend ve dehliz ve kenîf ve tahtânî bir sagīr oda ve bi’r-i mâyı binâ ve ihdâs etmiş idim, hâlâ ebniye-i memlûke-i mezkûremi hasbeten li’llâhi te‘âlâ vakf-ı sahîh-i müebbed ve habs-i sarîh-i muhalled ile vakf ve habsedip şöyle şart eyledim ki menzil-i mezbûrun süknâ ve tasarrufu hayâtda oldukça bana ve bi-emrillâhi te‘âlâ vefât eylediğimde süknâ-yı menzil-i mezbûr câmi‘-i mezkûrda imam olanlara meşrûta olup mukābelesinde huzûrunda beher yevm bir Yâsîn-i şerîf tilâvet edip sevâbını [98a] rûhuma ihdâ eyleyeler ve vakf-ı mezbûrun tevliyetini imama meşrûta ve ahâlî-i mahâlle-i mezbûr hasbî nâzır olalar ve şart-ı mezkûre ri‘âyet müte‘azzir olursa süknâ-yı menzil-i mezbûr mutlakā fukarâ-yı Müslimîne ola ve vakf-ı mezbûrun tebdîli ve tağyîri merreten ba‘de-uhrâ yedimde ola deyüp fâriğān ani’ş-şevâgil menzil-i mezbûru mütevellî-i mezbûra teslîm ol dahi bi’t-tevliye ve vakfiyet üzere kabz ve tesellüm eyledi dedikde gıbbe’t-tasdîki’ş-şer‘î vâkıf-ı mûmâ-ileyh inân-ı kelâmını semt-i âhara atfedip arsa-i mevkūfe-i mezbûre üzerine olan ebniyenin vakfı sahîh ve lâzım olmamağla vakfımdan rücû‘ ve ebniye-i mezkûremi kemâ-fi’l-evvel mülküme istirdâd murâd ederim dedikde mütevellî-i mezbûr Mustafa Efendi cevâb-ı bâ-sevâba mütasaddî olup arsa-i mevkūfe üzere olan ebniye-i memlûkenin vakfiyetinin sıhhati ulemâ-yı izâm ve meşâyih-i kirâm tecvîz etmeleriyle vakf-ı mezbûru tecvîz edip meşâyih kavilleri üzere vakf-ı sahîh ve sıhhat lüzûmu müstelzim olmağla menzil-i mezbûru redd ü teslîmden imtinâ‘ ve hâkim-i muvakkı‘-ı sadr-ı kitâb tûbâ lehû ve hüsnü-meâb hazretleri huzûrunda müterâfi‘ân olduklarında hâkim-i mûmâ-ileyh tarafeynin kelâmına nazar ve mennâ‘un li’l-hayr olmakdan hazer edip mütevellî-i mezbûrun takrîr-i meşrûhu üzere vakf-ı mezbûru tecvîz eden meşâyih-i izâm kavilleri ile amel edip vakf-ı mezbûrun sıhhatine ve alâ-kavli men yerâhu lüzûmuna dahi hükm edip min-ba‘d vakf-ı mezbûr sahîh ve lâzım olup nakz ve nakzına mecâl muhâl oldu. “Femen beddelehû ba‘de-mâ-semi‘ahû fe-innemâ ismühû alellezîne yübeddilûnehû innallâhe semî‘un alîm” cerâ zâlik. Ve hurrire fi’l-yevmi’l-hâmis min-Cemâziyelâhire li-sene sitte aşere ve mi’e ve elf. Şuhûdü’l-hâl: İbrahim Efendi b. el-Hâc Mehmed imam-ı Mimar Ayas, Nasuh Efendi b. Abdullah, Ahmed Çelebi b. Mahmud, es-seyyid Mehmed Efendi b. Mustafa Sinobî, Hasan b. Ali el-müezzin, Ali Beşe, b. Bayram, Molla Abdurrahman b. Mustafa, el-Hâc Abdullah b. Ömer, İbrahim Çelebi b. Mustafa, Molla Ahmed [b] Müezzin Ali Küreli