Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 408 Hüküm no: 411 Orijinal metin no: [98a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Parnak v. Hanik’in Mehmed Çelebi aleyhine açtığı alacak davasının reddedilmesi Ekmekçi tâifesinden Parnak v. Hanik nâm Ermeni mahmiye-i İstanbul’da meclis-i şer‘-i hatîrde işbu bâ‘isü’l-vesîka Mehmed Çelebi b. Hasan nâm kimesne mahzarında üzerine da‘vâ ve takrîr-i kelâm edip işbu mezbûr Mehmed Çelebi târîh-i kitâbdan altı sene mukaddem ismi ma‘lûmum değil bir kimesne ile üzerime şehâdet edip kezâlik ismi ma‘lûmum değil bir kimesne bi-gayrı hakkın otuz sekiz guruşumu ahz u kabz ettirmekle hâlâ meblağ-ı mezbûru merkūm Mehmed Çelebi’den taleb ederim suâl olunup alıverilmek matlûbumdur dedikde müdde‘î-i mezbûrun takrîr-i meşrûhu üzere meblağ-ı mezbûru merkūm Çelebi’den taleb ve da‘vâsı meşrû‘a olmayıp mezbûr Mehmed Çelebiye suâl dahi teveccüh etmemeğin müdde‘î-i merkūm Parnak bî-vech mu‘âraza ve mutâlebeden men‘ birle mâ hüve’l-vâki‘ bi’t-taleb ketb ve terkīm olundu. Fi’l-yevmi’s-sâlis aşer min-Cumâdelâhire li-sene sitte aşer ve mi’e ve elf. Şuhûdü’l-hâl: Mehmed Efendi b. Ahmed el-kādı, Veliyüddin Efendi kâtib, el-Hâc Yusuf b. Osman el-muhzır, Mustafa Çelebi b. tâbi‘-i şer‘iyyâtçı efendi, Abdi Çavuş b. Yusuf el-mübâşir, Ahmed Çavuş Ağa b. İbrahim, Abdullah Çavuş Ağa b. Derviş, ve gayruhum mine’l-hâzırîn.