Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 408 Hüküm no: 412 Orijinal metin no: [98a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aşçıbaşı İbrahim Ağa ile Mehmed Ağa’nın Filibe cizyesinden dolayı birbirlerinin zimmetlerini ibra etmeleri Mahmiye-i İstanbul’da Kadırga Limanı kurbünde meşhûr Ağa mahâllesinde sâkin ve sâbıkā Aşçıbaşı olan İbrahim Ağa b. Mehmed nâm kimesne mahmiye-i mezbûrede meclis-i şer‘de vilâyet-i Rumeli’nde medîne-i Filibe ahalîsinden olup mahmiye-i mezbûrede Balatkapısı kurbünde sâkin işbu râfi‘ü’l-vesîka Mehmed Ağa b. Ramazan nâm kimesne mahzarında ikrâr ve takrîr-i kelâm edip bin yüz on dört senesinde ben taht-ı iltizâmımda olan mârrü’z-zikr Filibe kazâsı Kıbtiyânı cizyelerini Kıbtiyân tâifesinden cem‘ ü tahsîl ve ahz u kabz ve bana îsale ve teslîme tarafımdan mezbûr Mehmed Ağa’yı tevkîl ve Müslümân ve kefere evrâkı mahlût ve beynimizde ma‘lûm olan iki bin sekiz yüz aded cizye evrâkını mezbûr Mehmed Ağa’ya teslîm ol dahi ber-vech-i muharrer ba‘de’l-ahz evrâk-ı mezbûrenin iki bin dört yüz adedini tâife-i mezbûreye tevzî‘ ve akçelerini ba‘de’l-cem‘ ve’t-tahsîl sebebi tahrîr hükmü ve emrimle havâle eylediğim mahâllere teslîm eyleyib bu vech üzere tevzî‘ olunan bin dört yüz aded evrâkın akçelerini istifâ olunup evrâk-ı mezbûreden tevzî‘i mümkün olmayıp bâkī kalan yüz yirmi dört aded tâife-i mezbûrenin keferesi evrâkı iki yüz yetmiş altı aded Müslümân evrâkı ki cem‘an dört yüz aded evrâkı işbu meclis-i şer‘de mezbûr Mehmed Ağa bana def‘ ü teslîm ben dahi yedinden ahz u kabz edip husûs-ı mezkûra ve târîh-i kitâba gelince sâir beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allıka âmme-i de‘âvî ve kâffe-i mutâlebâtdan [98b] ben mezbûr Mehmed Ağa’nın zimmetin ibrâ-i âmm-ı kātı‘ü’n-nizâ‘la ibrâ ve iskāt eyledim mezbûr Mehmed Ağa dahi gıbbe’l-hesâb ziyâde hakkım geçmişdi deyü benden iddi‘â eylediği dokuz yüz guruşa ve husûs-ı mezkûra ve târîh-i kitâba gelince sâir beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allıka âmme-i de‘âvî ve kâffe-i mutâlebâtdan benim zimmetimi ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ min-Cemâziyelâhire li-sene sitte aşere ve mi’e ve elf. Şuhûdü’l-hâl: Bosnavî Hüseyin Bey gulâm-ı bâkī, Ali Ağa kethüdâ-i hazret-i Osman Paşa, Osman Ağa b. Mustafa, Halil Bey b. Hasan, Hasan Çelebi b. Halil, Abdurrahman Çelebi b. Ali