Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 409 Hüküm no: 413 Orijinal metin no: [98b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un Mehmed Bey aleyhindeki menzil davasını ispat edemediği Vilâyet-i Anadolu’da Kastamonu sancağında Devrekânî kazâsına tâbi‘ Depe nâm karyede sâkin iken bundan akdem vefât eden Hüseyin b. Dursun’un verâseti sulbiye-i kebîre kızları Fâtıma ve Havva nâm hatunlara münhasıra olduğu lede’ş-şer‘ zâhir ve müte‘ayyin oldukdan sonra mahmiye-i İstanbul’da Mahmudpaşa mahâllesinde sâkine olup zâtı ma‘rifet-i şer‘iyye ile ârifân olan Mehmed b. Ahmed ve Mahmud b. Mehmed nâm kimesneler ta‘rîfleriyle mu‘arrefe olan mezbûre Fâtıma Hatun mahmiye-i mezbûrede meclis-i şer‘-i hatîr-i lâzımü’t-tevkīrde işbu râfi‘ü’l-kitâb Mehmed Bey b. Süleyman nâm kimesne mahzarında üzerine da‘vâ ve takrîr-i kelâm edip zikri mürûr eden Depe nâm karyede vâki‘ etrâf-ı erba‘ası cidâr-ı câmi‘ ve mezbûr Mehmed Bey’in mülkü ve tarîk-i âm mahdûd ve büyût-ı adîde ve anbar ve samanhâneyi müştemil mülk menzil babamız müteveffâ-yı mezbûr Hüseyin’in ile’l-vefât mülkü olup ba‘de-vefâtihî bi’l-irsi’ş-şer‘î benimle kız karındaşım mezbûre Havva’ya isâbet ve intikāl etmiş iken mezbûr Mehmed Bey menzil-i mezkûre bi-gayrı hakkın vaz‘-ı yed eder suâl olunup menzil-i mezkûrda olan nısf hisse-i şâyi‘amdan kasr-ı yed ve mahâllinde bana teslîme mezbûra tenbîh olunmak matlûbumdur dedikde gıbbe’s-suâl ve akībe’l-inkâr müdde‘iye-i mezbûreden müdde‘âsına mutâbık beyyine taleb olundukda ityân-ı beyyineden izhâr-ı acz ile istihlâf etmeğin fi’l-vâki‘ müdde‘iye-i mezbûrenin minvâl-i meşrûh üzere menzil-i mezkûrda olan nısf hisse-i şâyi‘asın bi-gayrı hakkın vaz‘-ı yed ve zabt etmeyip el-an mahâllinde redd ü teslîm üzerine lâzım gelmediğine mezbûr Mehmed Bey’e yemîn teklîf olundukda ol dahi hasbe’l-mesûl yemîn billâhi’l-aliyyi’l-a‘lâ etmeğin mûcebince müddeiye-i mezbûre Fâtıma Hatun ber-vech-i muharrer bilâ-beyyine bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sâbi min-Cemâziyelâhire li-sene sitte aşere ve mi’e ve elf. Şuhûdü’l-hâl: Osman Ağa b. Mustafa, Halil Bey b. Hasan, Ali Çelebi b. Abdurrahman, Halil Çelebi b. Hüseyin, Mehmed b. Abdullah.