Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 410 Hüküm no: 414 Orijinal metin no: [98b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf b. Abdullah’ın İbrahim Çelebi’yi vasi tayin etmesi Mahmiye-i İstanbul’da Timurtaş mahâllesi sâkinlerinden el-Hâc Yusuf b. Abdullah nâm kimesne mahmiye-i mezbûrede meclis-i şer‘de işbu râfi‘ü’l-vesîka İbrahim Çelebi b. el-Hâc Ali ve el-Hâc Ahmed b. Hasan nâm kimesneler mahzarlarında ikrâr ve takrîr-i kelâm edip hâlâ ben marîz ve alîl olmağla bi-emrillâhi te‘âlâ fevt olduğumda mezbûr İbrahim Çelebi cemî‘ malımı ahz u kabz eylediğinden sonra sülüs malımdan yüz guruş ile techîz ve tekfîn ve sâir masârıf-ı defnim görülüp ve elli guruş dahi ıskāt-ı salâtım için harc u sarf eyleyip ve elli guruş dahi câriye-i mu‘takam Şahbaz bt. Abdullah’a ve on beş guruş dahi mahâlle-i mezbûrede sâkin Ahmed Efendi b. Osman [nâm] kimesneye verile ve yüz guruş dahi mezbûr el-Hâc Ahmed’e verilip sülüs-i mezkûrun masârıf-ı mezbûreden fazlası vücûh-ı birre harc u sarf oluna ve mâ‘adâ [99a] terekemden zevce-i menkûham Fâtıma bt. el-Hâc Mehmed’e zimmetimde mütekarrir ve ma‘kūdün-aleyh deynim olan yüz elli guruş ve âhar zevcem Hadîce bt. Abdullah’a dahi kezalik zimmetimde mütekarrir ve ma‘kūdün-aleyh olan yirmi beş guruş ve hisse-i şer‘iyyeleri zevcelerim mezbûretâna verildikden sonra ve benim zevcelerim mezbûretândan gayrı kat‘â vârisim olmamağla mâ‘adâ terekemi bi’l-cümle mezbûr İbrahim Çelebi mûsâ-leh olmak üzere ahz u kabz eyleye deyü vasiyet ve vesâyâ-yı mezkûremi tenfîze mezbûr İbrahim Çelebi’yi vasiyy-i muhtâr nasb u ihtiyâr edip ve mezbûr el-Hâc Ahmed dahi husûs-ı mezbûra nâzır nasb u ta‘yîn eyledim dedikde mezbûr İbrahim Çelebi vesâyet-i mezbûremi ve merkūm el-Hâc Ahmed dahi nezâret-i mezkûremi kabûl ve hizmet-i lâzımelerini her biri mahâllinde edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sâlis aşer min-Cemâziyelâhire li-sene sitte aşere ve mi’e ve elf. Şuhûdü’l-hâl: İbrahim Çelebi b. el-Hâc Ahmed, Osman Çelebi b. el-Hâc Ali, el-Hâc Mehmed b. Ahmed, Şeyh Abdülcevad Efendi, el-Hâc Ahmed b. el-Hâc İbrahim, Ahmed Efendi b. Musa, el-Hâc İbrahim gazzâz.