Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 411 Hüküm no: 415 Orijinal metin no: [99a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Musa’nın boşandığı eşi Süleyman Çelebi aleyhindeki davasında sulh olması Mahrûse-i Galata kazâsı muzâfâtından kasaba-i Tophanede Perviz Ağa mahâllesi sâkinelerinden olup zâtı Receb b. Osman ve Mustafa b. İsmail nâm kimesneler ta‘rîfleriyle mu‘arrefe olan Âişe bt. Musa nâm hatun mahmiye-i İstanbul’da meclis-i şer‘-i enverde zevc-i sâbıkı işbu bâ‘isü’l-vesîka Süleyman Çelebi b. Mustafa nâm kimesne mahzarında ikrâr ve takrîr-i kelâm edip mezbûr Süleyman Çelebi mukaddemâ zevcim olup beynimizde hüsn-i zindegânemiz olmamağla zimmetinde mütekarrir ve ma‘kūdün-aleyh olan bin akçe mehr-i müeccelim üzerine ve mezbûrun firâşından hâsıl batnımda mevcûd olan hamlim vaz‘ edinceye değin nafaka ve iddetim ve meûnet-i süknâm dahi kendi üzerime olmak üzere bundan akdem zevcim mezbûr Süleyman ile muhâla‘a ve her birimiz hul‘-ı mezbûru kabûl etmiş idik. Lâkin ben hul‘-ı mezbûr ikrâh-ı mu‘teber ile olmuş idi deyü zevcim mezbûr Süleyman’dan da‘vâ eylediğimde ol dahi ikrâh-ı mu‘teberi inkâr edip bu vech üzere beynimizde nizâ‘-ı küllî vâki‘ olmuş idi. El-hâletü hâzihi beynimize muslihûn tavassut edip da‘vâ-i mezbûrumdan beni mezbûr Süleyman Çelebi ile üç buçuk guruş üzere sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr üç buçuk guruşu mezbûr Süleyman Çelebi yedinden ahz u kabz edip husûs-ı mezbûra müte‘allıka âmme-i da‘vâdan mezbûr Süleyman Çelebi’nin zimmetini ibrâ ve iskāt edip ol dahi bedel-i sulh olmak üzere bana medfû‘u olan meblağ-ı mezbûr üç buçuk guruş da‘vâsından benim zimmetimi ibrâ ve iskāt eyledi dedikde gıbbe’t-tasdîki’l-mu‘teber mâ-vaka‘a bi’t-taleb ketb olundu. Fi’l-yevmi’s-sâlis aşer min-Cemâziyelâhir li-sene sitte aşere ve mi’e ve elf. Şuhûdü’l-hâl: Ali Çavuş [b.] Abdullah, Ali Çelebi b. Receb, Molla Abdi b. Ömer Efendi, Ali Efendi el-kādı, el-Hâc Mehmed Efendi, el-kādı, Sandalcızâde İsmail Efendi, Ömer Efendi b. Ali Efendi el-kādı.