Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 411 Hüküm no: 416 Orijinal metin no: [99a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Ağa’nın menzil, arsa, tarla ve değirmenini Salih Ağa ve sairlerine satması Vilâyet-i Rumeli’nde Bosna Sarayı mahâllâtından el-Hâc Süleyman mahâllesi ahâlîsinden olup, sâbıkā medîne-i Saray cizyedârı olan Ömer Ağa b. Fazlullah b. Mahmud nâm kimesne tarafından husûs-ı âti’l-beyana vekîl olduğu es-Seyyid Mustafa Efendi b. es-Seyyid Osman ve Salih Ağa b. el-Hâc Ahmed nâm kimesneler şehâdetleriyle şer‘an sâbit olan İsmail Bey b. Ahmed nâm kimesne mahmiye-i İstanbul’da Meclis-i şer‘de eyâlet-i Bosna’da vâki‘ Dupniçe ve Novi ve Hududa? ve Ma‘den-i atik nâm palankalar neferâtından olup kendi taraflarından asil ve zikr olunan plankaların taraflarında bin yüz on dört senesinde müstahık oldukları mevâciblerini bâ-fermân-ı âlî havâle olunan mahâlleden ahz u kabza ve husûs-ı âti’l-beyana vekîl-i müseccelleri olan işbu bâ‘isü’l-vesîka Dubniçe ve Hududa? neferâtından [99b] Salih Ağa b. Ebubekir ve Süleyman Ağa b. Mehmed ve Novi ve Ma‘den-i atik neferâtından Ömer Ağa b. Mahmud ve Ahmed Kethüda b. Ali nâm kimesneler mahzarında bi’l-vekâle ikrâr ve takrîr-i kelâm müvekkilim hazînedârım merkūm Ömer Ağa akd-i âti’z-zikrin sudûruna değin yedinde mülk ve hakkı olup kazâ-i mezbûre tâbi‘ Bostancı cemâ‘ati kurâlarından Zabderya? nâm karyede vâki‘ bir tarafdan nehr-i Bosna ve bir tarafdan Fazlı Hoca nâm kimesne tasarrufunda olan arazi ve bir tarafdan ba‘zan Mataracı Mustafa Efendi ve ba‘zan Süleyman Efendi ve ba‘zan Ahmed Efendi nâm kimesneler mülkleri ve bir tarafdan tarîk-i âm ile mahdûd tahtânî ve fevkānî dört bâb oda ve dört samanlık ve dört ahır ve dört harman yeri ve bir mikdâr bahçe ve koruyu müştemil İsmail Bey ve el-Hâc Ebubekir Çiftliği demekle ma‘rûf menzilini ve hîn-i akd-i bey‘de menzil-i mezkûrun içinde mevcûd altı baş karasığır öküzü ve dört baş karasığır ineğini ve yine medîne-i mezbûrda Çayırcık mahâllesinde vâki‘ Milaçıka? nâm nehir ile altı göz değirmenini safkatin vâhidetin ve tarafından îcâb ve kabûlü hâviye bey‘-i mu‘teber ile mezbûrûn Salih Ağa ve Süleyman Ağa ve Ömer Ağa ve Ahmed Kethüdâ’ya iki [bin] beş yüz guruşa bey‘ ve temlîk ve mevâzi‘-i adîdede vâki‘ olup çiftlik-i mezbûra teba‘iyet ile zirâ‘at ve hırâset olunur ma‘lûmü’l-hudûd ve’l-kıt‘a tarlalarının hakk-ı tasarrufunu ve yine mahâlle-i mezbûrda vâki‘ bir tarafdan Molla Çakır nehri ve üç tarafdan tarîk-i âm ile mahdûd Yahya Paşa nâm kimesneden iştirâ eylediğim <> Mehmed Paşa arsası demekle ma‘rûf menzil arsasını <> ve der-ambar yüz yirmi keyl arpa ve buğdayını müştemil <> ile üç bin guruş <> mezbûrûna ferâğ ve tefvîz onlar dahi ber-vech-i muharrer iştirâ ve temellük ve tefevvüz ve kabûl eylediklerinden sonra semen <> olan beş bin beş yüz guruşu neferât-ı mezkûreye bin yüz on dört senesi mevâcibleri için bin yüz on beş senesinde uhdesinde olan cizye-i mezkûre malından olmak üzere sebeb-i tahrîr hükmü ile kendinden mezbûrûna havâle olunan altı bin altı yüz guruş mevâciblerinden zimmetinde bâkī kalan beş bin beş yüz guruş deynine takās onlar dahi asâleten ve vekâleten mukāssa ve kabûl eylediklerinden sonra mârrü’z-zikr çiftlik ve değirmen ile sâlifü’z-zikr menzil arsası ve tarlaları mahâllerinde zabt ve tasarrufa merkūmûnu taslît eyledi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî min-Cemâziyelâhir li-sene sitte aşere ve mi’e ve elf. Şuhûdü’l-hâl: Mehmed Efendi b. Ali defter[d]âr-ı Bosna, İbrahim Ağa b. Mehmed Kaptan, el-Hâc Mustafa Ağa b. Abdullah, Yusuf Ağa hazînedâr, Cafer Ağa tâbi‘-i es-Seyyid Mustafa Efendi.