Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 413 Hüküm no: 417 Orijinal metin no: [99b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Biruze bt. Muharrem’in, vefat eden kardeşi Mehmed’in terekesinden dolayı davalı olduğu Avram ile sulh olması Vilâyet-i Rumeli’nde Mora cezîresinde Trapoliçe kasabası ahâlîsinden olup medîne-i Hazret-i Ebâ Eyyûbe’l-ensârî -aleyhi rahmetü’l-bârîde- sâkin iken bundan akdem vefât eden Mehmed Ağa b. Muharrem b. Hasan’ın li-ebeveyn kız karındaşı ve hasran vârisesi olup mahmiye-i İstanbul’da Alipaşa-i atik mahâllesinde sâkine ve zâtı ma‘rifet-i şer‘iyye ile ârifân Abdülkadir b. Ömer ve Osman b. Seydi nâm kimesneler ta‘rîfleriyle mu‘arrefe olan Biruze nâm hatun mahmiye-i mezbûrda meclis-i şer‘de işbu râfi‘ü’s-sifr Avram v. Mosi nâm Yahûdî muvâcehesinde ikrâr ve takrîr-i kelâm edip karındaşım müteveffâ-yı mezbûr Mehmed Ağa hayâtında malından alâ tarîkı’l-mudârebe altı yüz yaldız altını ile beş yüz guruşunu merkūm Avram’a def‘ ve teslîm ol dahi ber-vech-i muharrer ba‘de’l-ahz zikri mürûr eden altı yüz yaldız altını ile beş yüz guruşu minvâl-i meşrûh üzere i‘mâl etmeyip kendi masârıfına sarfla istihlâk eyledikden sonra meblağ-ı mezkûru kable’l-ahz karındaşım merkūm Mehmed Ağa fevt olup meblağ-ı mezbûr ırsen bana intikāl etmiş idi deyü meblağ-ı mezkûru bi’l-verâse mezbûr Avram’dan taleb ve da‘vâ eylediğimde [100a] ol dahi husûs-ı mezkûru bi’l-külliye inkâr eyleyip bu vech üzere beynimizde münâza‘ât-ı kesîre ve muhâsamât-ı şedîde vâkı‘a olmuşu idi. El-hâletü hâzihi beynimize muslihûn tavassut edip da‘vâ-i mezkûrumdan beni merkūm Avram ile yüz guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yüz guruşu mezbûr Avram yedinden işbu meclis-i şer‘de tamâmen ahz u kabz edip husûs-ı mezkûra ve müteveffâ-yı mezbûr ile ile’l-vefât sâir beynlerinde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allıka âmme-i de‘âvî ve kâffe-i mutâlebâtdan mezbûr Avram’ın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim mezbûr Avram dahi bedel-i sulh deyü bana medfû‘u olan meblağ-ı mezbûr yüz guruşa ve gayra müte‘allıka cemî‘ da‘vâdan benim zimmetimi ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ min-Cemâziyelâhir li-sene sitte aşere ve mi’e ve elf. Şuhûdü’l-hâl: Süleyman Ağa b. Ebubekir, Süleyman Efendi b. Şaban, Mehmed Efendi b. eş-Şeyh Süleyman Efendi, Zeynelabidin b. Zeynelabidin, Ali Çavuş b. Hasan, el-Hâc Halil b. Abdülkerim.