Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 413 Hüküm no: 418 Orijinal metin no: [100a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Tarandafilo’nun İlya v. Koço’da olan alacağının babası tarafından tahsili Vilâyet-i Rumeli’nde bi’l-fi‘il Yenişehir-i Fener kādısı olan umdetü’l-mevâli’l-izâm Şerîf Efendi b. Mahmud b. Ali kıbelinden imzâ ve hatemini ve târîhi’l-kitâb senesi Cumâdelûlâsı’nın yirmi ikinci günü târîhiyle müverrah kitâb-ı naklî vârid olup mazmûnu Yenişehir-i Fener muzâfâtından Ağrafe nâhiye[sine] tâbi‘ Petrol nâm karyede mütemekkine Aksanti bt. Kosta v. Yani nâm Nasrâniyeden vech-i âtî üzere da‘vâ-i sahîh-i şer‘iyye ile mesbûk istişhâd-ı şer‘î sudûrundan sonra udûl-i millet-i Nasârâdan olup karye-i mezbûre mütemekkinlerinden Yani v. Papa Polizo v. Papa Pinayon ve Aldoni v. Alekşi ve Londorfi nâm zimmîler nakl ü tahvîl için mahâll-i cerh ve ta‘dîle li-ecli’ş-şehâde hâzırân olup şöyle edâ-yı şehâdet-i şer‘iyye eyledikde fi’l-asıl mârrü’z-zikr Petrol karyesi re‘âyâsından olup bundan akdem ticâretle İstanbul’a giderken esnâ-i tarîkde helâk ve terekesi İstanbul’da şerîki Hıristo v. Dimo nâm zimmî yedinde mazbûta etdiği mesmû‘umuz olan Trandafilo v. Dotori v. Yani nâm zimmî müsteşhid-i merkūm Aksanti Nasrâniyenin sadrî oğlu olmağla hâlik-i merkūm Tarandafilo’nun verâseti anası merkūme Aksanti Nasrâniyeye münhasır olup ondan gayrı vârisi ve terekesine müstahıkk-ı âhar olduğu ma‘lûmumuz değildir hâlik-i merkūmenin mecmû‘-ı terekesini şerîki merkūm Hıristo zimmîden ve sâir vâzı‘ü’l-yed olanlardan müsteşhid-i merkūme Aksanti Nasrâniye için hakk-ı taleb ve ahz vardır bu husûsa bu vech üzere şâhidleriz şehâdet dahi ederiz deyü her birimiz edâ-yı şehâdet-i şer‘iyye eylediklerinden ba‘de-ri‘âyet-i şerâiti’l-kabûl şehâdetleri makbûle olmağın müsteşhide-i mezbûre Aksanti Nasrâniye oğlu hâlik-i merkūm Tarandafilo’nun terekesini merkūm Hıristo’dan ve sâir vâzı‘ü’l-yed olanlardan taleb ve da‘vâ ve ahz u kabza ve kendüye îsâle ve kabz ve îsâl mütevakkıf olduğu umûrun küllîsine tarafından nâkilü’l-kitâb İşteryo v. Nikola nâm zimmîyi vekîl ve nâib-i menâb nasb u ta‘yîn ettikde ol dahi vekâlet-i merkūmeyi kabûl ve merâsimini edâya müte‘ahhid olduğunu hâvî bulunmağın Abacı tâifesinden olup hâlik-i merkūmun on yedi guruş ile medyûnu olan İlya v. Koço nâm zimmî vekîl-i merkūmun taleb ve da‘vâsıyla meclis-i şer‘e ihzâr ve kitâb-ı mezbûr muvâcehesinde kırâet olunup istintâk olundukda mezbûr İlya [100b] cevâbında fi’l-vâki‘ hâlik-i merkūma cihet-i karzdan zimmetinde ol mikdâr guruş deyni olduğunu ikrâr lâkin kitâb-ı merkūmun mevlânâ-yı müşârün-ileyh kıbelinden vürûdu ma‘lûmum değildir deyü inkâr etmeğin vekîl-i merkūmdan kitâb-ı mezkûrun mevlânâ-yı müşârün-ileyh kıbelinden vürûduna beyyine taleb olundukda zeylinde isimleri mastûr olan şuhûd tarîkinden Mustafa b. Abdullah b. Abdurrahim ve Ahmed b. Abdurrahman b. Abdullah nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-vâki‘ işbu kitâb-ı naklî hâlâ Yenişehir-i Fener kādısı olan umdetü’l-mevâli’l-izâm Şerîf Efendi b. Mahmud b. Ali üzerimize kırâet ve huzûrumuzda ba‘de’l-imzâ mühürleyüp hatt ü hatemine bizi işhâd eyledi, hâlâ kitâb-ı mezbûrun zeylinde olan imzâ mevlânâ-yı müşârün-ileyhin kendi hattı ve zahrında olan hatem kendi hatemidir kitâb-ı mezbûrun mevlânâ-yı müşârün-ileyh kıbelinden vürûduna bu vech üzere şâhidleriz şehâdet ederiz deyü her biri edâ-yı şehâdet-i şer‘iyye etdikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm meblağ-ı [mezbûr] on yedi guruşu vekîl-i mezbûr İşteryo’ya edâ ve teslîme merkūm İlya’ya tenbîh olunup mâ vaka‘a bi’t-taleb ketb olundu. Fi’l-yevmi’s-sâlis aşere min-Cemâziyelâhire li-sene sitte aşere ve mi’e ve elf. Şuhûdü’l-hâl: Ali Efendi b. Ahmed, el-Hâc Mehmed Efendi b. Ahmed Efendi, İsmail Efendi el-kādı, Ömer Efendi el-kādı, Mustafa Efendi el kādı.