Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 415 Hüküm no: 419 Orijinal metin no: [100b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın Hüsrev Kethüda Evkafı’na borcunu ödemesi Mahmiye-i İstanbul’da Hüsrev Kethüdâ Evkāfı’nın nukūd-ı mevkūfesine bi’l-fi‘il mütevellî olan Ali Ağa b. Hasan nâm kimesne tarafından meblağ-ı âti’z-zikri taleb ve da‘vâ ve ahz u kabza [ve] kendüye îsâle vekîl olduğu Hamza Efendi b. Mustafa Muslı ve Yahya Çelebi b. Abdullah nâm kimesneler şehâdetleriyle hasm-ı câhid-i şer‘î muvâcehesinde şer‘an sâbit ve sübût-ı vekâletine hükm-i şer‘î lâhık olan işbu bâ‘isü’l-kitâb el-Hâc Mustafa b. Ali nâm kimesne mahmiye-i mezbûrede meclis-i şer‘-i hatîrde sâbıkā İstanbul Ağası olan Mehmed Ağa b. Ali Ağa mahzarında bi’l-vekâle üzerine da‘vâ ve takrîr-i kelâm edip mezbûr Mehmed Ağa bundan akdem mâl-ı vakf-ı mezbûrdan bin guruş istidâne ve ahz u kabz etmekle meblağ-ı mezbûru merkūm Mehmed Ağa’dan bi’l-vekâle taleb eylediğimde edâdan imtinâ‘ eder, suâl olunup alıverilmesi murâdımdır dedikde gıbbe’s-suâl mezbûr Mehmed Ağa cevâbında fi’l-hakīka vakf-ı mezbûra meblağ-ı mezbûr bin guruş zimmetimde lâzımü’l-edâ ve vâcibü’l-kazâ deynimdir deyü bi-tav‘ihî ikrâr u i‘tirâf etmeğin mûcebince meblağ-ı mezbûru müdde‘î-i merkūma edâ ve teslîme merkūm Mehmed Ağa’ya tenbîh birle mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Cemâziyelâhire li-sene sitte aşere ve mi’e ve elf. Şuhûdü’l-hâl: Yusuf Beşe b. Ömer, Hüseyin Çelebi b. Salih, Ahmed Çelebi b. Ali, Mehmed Çelebi b. Musa, , Ahmed Bey b. Receb, Ali b. Ahmed, Mehmed Çelebi b. Ali, Receb Bey b. Süleyman.