Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 415 Hüküm no: 420 Orijinal metin no: [100b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa’nın Mehmed Ağa ile bağ satışından dolayı olan davasında sulh olması Medîne-i Üsküdar tevâbi‘inden Adalar nâhiyesine [muzâf] Uzunköy ahâlîsinden İbrahim Ağa b. İsmail nâm kimesne mahmiye-i İstanbul’da meclis-i şer‘-i enverde işbu râfi‘ü’l-kitâb el-Hâc Mehmed Ağa b. Mustafa mahzarında ikrâr ve takrîr-i kelâm edip târîh-i kitâbdan yedi sene mukaddem karye-i mezbûre sınırı dâhilinde vâki‘ etrâf-ı erba‘adan es-Seyyid Mehmed ve es-Seyyid Ali ve Ahmed Çelebi ve Fâtıma Hatun ve el-Hâc İbrahim mülkleri ve tarîk-i âm ile mahdûd bir bi’r-i mâ ve eşcâr-ı müsmire ve gayr-ı müsmireli ve kürûmu müştemil mülk bağımı cemî‘ tevâbi‘ ve levâhıkı ile tarafeynden îcâb ve kabûlü hâvî bey‘-i bâtt-ı kat‘î ile mezbûr el-Hâc Mehmed Ağa’ya yedi yüz elli guruşa bey‘ ve teslîm ol dahi ber-vech-i muharrer iştirâ ve kabûl ve tesellüm eyleyip semen-i mezbûru yedinden tamâmen ahz u kabz etmiş idim. El-hâletü hâzihi bağ-ı mahdûd-ı mezkûrun kıymeti [101a] hîn-i bey‘de bin iki yüz guruş iken bağ-ı mezbûr meblağ-ı mezbûr yedi yüz elli guruşdan ziyâde değmez deyü mezbûr el-Hâc Mehmed Ağa beni ta‘zîr edip bey‘-i mezkûr tağrîr ve gabn-i fâhiş ile olmuş idi deyü mezbûr el-Hâc Mehmed Ağa’dan da‘vâ ol dahi tağrîr ve gabn-i fâhişi inkâr etmekle beynimizde nizâ‘-ı kesîr vukū‘undan sonra beynimize muslihûn tavassut edip da‘vâ-i mezbûremden mezbûr el-Hâc Mehmed Ağa ile beni yüz guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yüz guruşu yedinden tamâmen ahz u kabz edip ber-vech-i muharrer tağrîr ve gabn-i fâhişe ve bağ-ı mezbûra ve gayre müte‘allıka âmme-i da‘vâdan mezbûr el-Hâc Mehmed Ağa’nın zimmetini ibrâ-i âmm-ı kātı‘ü’n-nizâ‘la ibrâ ve iskāt edip ol dahi bedel-i sulh deyü medfû‘u olan meblağ-ı mezbûr yüz guruş da‘vâsından benim zimmetimi ibrâ ve iskāt eyledi dedikde gıbbe’t-tasdîki’ş-şer‘î mezbûr İbrahim Ağa’nın karındaşı diğer Mehmed Ağa meclis-i mezbûrda mezbûr el-Hâc Mehmed Ağa mahzarında takrîr-i kelâm edip ben dahi bağ-ı mezbûrda benim alâka ve medhalim olmamağla bağ-ı mahdûd-ı mezkûra müte‘allıka da‘vâdan mezkûr el-Hâc Mehmed Ağa’nın zimmetini ibrâ ve iskāt eyledim dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fî-selhi Cemâziyelâhire li-sene sitte aşere ve mi’e ve elf. Şuhûdü’l-hâl: Mehmed Çavuş b. İbrahim, Davud Efendi b. Halil, Mehmed Efendi b. Hasan, Mehmed Odabaşı, Hasan Çelebi b. Ahmed, Hasan b. İbrahim, Receb b. Ahmed.