Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 416 Hüküm no: 421 Orijinal metin no: [101a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İslam b. Mehmed’in kardeşi Mahmud Çelebi aleyhindeki alacak davasının reddedilmesi Mahmiye-i İstanbul’da Kadırga limanı kurbünde Bostancıbaşı Ali Ağa mahâllesi sâkinlerinden İslâm b. Mehmed nâm kimesne mahmiye-i mezbûrede meclis-i şer‘de li-ebeveyn karındaşı işbu râfi‘ü’l-vesîka Mahmud Çelebi nâm kimesne mahzarında üzerine da‘vâ ve takrîr-i kelâm edip bundan akdem karındaşım mezbûr Mahmud Çelebi zimmetinde cihet-i deyn-i şer‘îden otuz iki guruş ve kendi emriyle masârıf-ı ma‘lûmesine harc u sarf eylediğim on bir guruş ki cem‘an kırk üç guruş hakkım olmağla meblağ-ı mezbûru taleb ederim, suâl olunup alıverilmesi matlûbumdur dedikde, gıbbe’s-suâl mezbûr Mahmud Çelebi cevâbında karındaşım müdde‘î-i mezbûr târîh-i kitâbdan üç ay mukaddem meblağayn-ı mezbûreyn kırk üç guruşu benden da‘vâ ben dahi inkâr eylediğimden mâ‘adâ benim dahi karındaşım müdde‘î-i mezbûr zimmetinde cihet-i deyn-i şer‘îden yirmi guruş hakkım olmağla meblağ-ı mezbûru ben dahi da‘vâya tasaddî eylediğimde beynimizde ba‘de’l-münâza‘a karındaşım müdde‘î-i mezbûr meblağayn-ı mezbûreyn kırk üç guruşa müte‘allıka âmme-i da‘vâdan benim zimmetimi ibrâ ve iskāt edip ben dahi meblağ-ı mezbûr yirmi guruşa müte‘allıka da‘vâdan karındaşım müdde‘î-i mezbûrun zimmetini ibrâ ve iskāt etmiş idim, def‘le mukābele edicek gıbbe’l-istintak mezbûr İslâm fi’l-hakīka karındaşı mezbûr Mahmud Çelebi’nin meblağayn-ı mezbûreyne müte‘allıka âmme-i da‘vâdan zimmetini ibrâ ve iskāt edip ol dahi meblağ-ı mezbûr yirmi guruşa müte‘allıka da‘vâdan kendinin zimmetini ibrâ ve iskāt eylediğini ikrâr u i‘tirâf etmeğin mûcebiyle müdde‘î-i mezbûr karındaşı mezkûr Mahmud Çelebi’ye bî-vech mu‘ârazadan men birle mâ-vaka‘a bi’t-taleb ketb olundu. Fî-selhi Cemâziyelâhire li-sene sitte aşere ve mi’e ve elf. Şuhûdü’l-hâl: Es-Seyyid Mustafa b. Ahmed, Hasan Çelebi b. Mehmed, el-Hâc Süleyman b. Ali, Hasan Çavuş el-mübâşir.