Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 418 Hüküm no: 423 Orijinal metin no: [101b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud b. Ahmed’in Hüseyin Beşe’ye Belgrad kalesi topçuları mevacibi olarak fazla vermiş olduğu meblağı geri alması Bâ-imzâ-i hazret efendi. Vilâyet-i Rumeli’nde Silistre sancağında Karinâbâd kasabası ahâlîsinden olup mahmiye-i İstanbul’da Sancakdar Hayreddin mahâllesinde müsâfiren sâkin işbu râfi‘ü’l-kitâb Mahmud b. Ahmed nâm kimesne mahmiye-i mezbûrede meclis-i şer‘de Hüseyin Beşe b. Mehmed nâm kimesne mahzarında üzerine da‘vâ ve takrîr-i kelâm edip ben bin yüz on dört ve yüz on beş senelerinde vilâyet-i mezbûrede vâki‘ Prizren ve Sohorika kazâları avârızları malından Belgrad’ın top arabacıları mevâcibleri için sebeb-i tahrîr hükmü ile bin yüz kırk esedî guruş ta‘yîn ve havâle ve meblağ-ı mezbûru mezbûr Hüseyin Beşe bâ-fermân-ı âlî kabzına memûr olmağla meblağ-ı mezbûr bin yüz kırk esedî guruşa husûs-ı mezbûra vekîlim olan gāib ani’l-meclis Osman Ağa nâm kimesneden mezbûr Hüseyin Beşe tamâmen ahz u kabz etmiş iken, mezbûr Hüseyin Beşe meblağ-ı mezbûrun vekîlen gāib-i mezbûr Osman Ağa’dan ancak sekiz yüz on dokuz guruş ahz u kabz edip, üç yüz yirmi bir guruş bâkī kalmışdır deyü meblağ-ı bâkī-i mezbûr üç yüz yirmi bir guruşu bi-gayrı hakkın benden ahz u kabz edip, hattâ mezbûr Hüseyin Beşe meblağ-ı mezbûr üç yüz yirmi bir guruşu tekrâr benden ahz u kabz eylediğini bundan akdem kirâren ve mirâren ikrâr u i‘tirâf dahi etmekle hâlâ mezbûr Hüseyin Beşe’ye suâl olunup ber-vech-i muharrer tekrâr makbûzu olan meblağ-ı mezbûr üç yüz yirmi bir guruşu bana edâ ve teslîme mezbûra tenbîh olunmak matlûbumdur dedikde, gıbbe’s-suâl mezbûr Hüseyin Beşe cevâbında minvâl-i meşrûh üzere havâleten meblağ-ı mezbûr bin yüz kırk guruşu müdde‘î-i mezbûrun vekîli gāib-i mezbûrdan tamâmen ahz u kabz eylediğini ikrâr, lâkin ben müdde‘î-i mezbûr yedinden ancak otuz guruş ahz u kabz, kâziben ikrâr eyledim deyücek, mezbûr Hüseyin Beşe minvâl-i meşrûh üzere olan ikrârında kâzib olmayıp kendi dahi da‘vâ-i mezkûresinde mübtıl olmadığına [102a] müdde‘î-i mezbûr Mahmud’a yemîn teklîf olundukda ol dahi hasebi’s-suâl [mesûl] yemîn billâhi’l-aliyyi’l-a‘lâ etmeğin mûcebince ziyâde makbûzu olan meblağ-ı mezbûr üç yüz yirmi bir guruşu müdde‘î-i mezbûra edâ ve teslîme mezbûr Hüseyin Beşe’ye ba‘de’t-tenbîh mâ-vaka‘a bi’t-taleb ketb olundu. Fi’l-yevmi’l-hâdi aşere min-Cemâziyelâhire li-sene sitte aşere ve mi’ete ve elf. Şuhûdü’l-hâl: İbrahim Efendi, Süleyman Ağa b. Abdülbaki, İsmail Efendi el-kādı, el-Hâc Yusuf b. Osman.