Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 419 Hüküm no: 424 Orijinal metin no: [102a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Arabzade Mehmed Ağa’nın Boğdan Beyi oğlu Aleksandr’da olan alacağının varislerine teslim olunması Mahmiye-i İstanbul’da Bahçekapısı kurbünde Çelebioğlu? mahâllesi ahâlîsinden olup mahrûse-i Edirne’de Rüstem Paşa Hanı’nda müsâfiren sâkin iken bundan akdem vefât eden Arabzâde Mehmed Ağa b. Abdullah b. Abdurrahman’ın verâseti zevce-i menkûha-i metrûkesi Ümmühan Hatun bt. Mehmed ile sulbî kebîr oğlu Derviş Ahmed ve sagīr oğlu Mehmed ve sagīre kızları Rukıye ve Emine’ye münhasıra olduğu şer‘an zâhir ve müte‘ayyin oldukdan sonra mezbûr Derviş Ahmed asâleten ve sıgār-ı mezbûrûnun vâlide ve vasiyyeleri mezbûre Ümmühani Hatun tarafından husûs-ı âti’l-beyana vekîl olduğu zâtı ma‘rifet-i şer‘iyye ile ârifân olan el-Hâc Mustafa b. Abdullah ve Mehmed Ağa b. Ahmed nâm kimesneler şehâdetleriyle şer‘an sâbit olan müvekkilem mezbûrenin hâlâ zevci Abdullah Ağa b. Mustafa nâm kimesne mahmiye-i mezbûrda meclis-i şer‘-i hatîrde Boğdan Beyi oğlu demekle ma‘rûf Aleksandr v. Anton nâm zimmî muvâcehesinde her biri üzerine da‘vâ ve takrîr-i kelâm edip mûrisimiz müteveffâ-yı mezbûrenin merkūm Aleksandr zimmetinde cihet-i karz-ı şer‘îden bin dokuz yüz elli guruş hakkı olup meblağ-ı mezbûru kable’l-ahz mezbûr Mehmed Ağa fevt olmağla meblağ-ı mezbûr merkūm Aleksandr zimmetinde kalmağın hâlâ meblağ-ı mezbûr bin dokuz yüz elli guruşu asâlet ve vekâletimiz hasebiyle mesfûr Aleksandr’dan taleb ederin, suâl olunsun dediklerinde gıbbe’s-suâl mesfûr Aleksandr cevâbında cihet-i mezkûreden müteveffâ-yı mezbûra zimmetinde ancak bin beş yüz guruş deyni olduğunu ikrâr, ziyâde iddi‘â olunan dört yüz elli guruşu inkâr edicek, müdde‘iyân-ı mezbûrândan ziyâde müdde‘âlarına beyyine taleb olundukda ityân-ı beyyine için istimhâl etmeğin mehl-i şer‘î ile ba‘de’l-imhâl ikrârı mertebesi olan meblağ-ı mezbûr bin beş yüz guruş müdde‘iyân-ı mezbûrâna edâ ve teslîme mesfûr Aleksandr’a ba‘de’l-hükm ve’t-tenbîh mâ-vaka‘a bi’l-kaleb ketb olundu. Fi’l-yevmi’r-râbi aşere min-Cemâziyelâhire li-sene sitte aşere ve mi’e ve elf. Şuhûdü’l-hâl: el-Hâc Mustafa b. Abdullah, Mehmed Ağa b. Ahmed, Mehmed Efendi b. Ahmed, el-Hâc Yusuf b. Osman.