Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 419 Hüküm no: 425 Orijinal metin no: [102a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. İbrahim’in kaynı Ahmed’e olan borcunun taksitlendirilmesi Mahmiye-i İstanbul’da Kādıasker Mehmed Efendi mahâllesinde sâkin el-Hâc Mehmed b. el-Hâc İbrahim nâm kimesne mahmiye-i mezbûrede meclis-i şer‘de kaynı işbu râfi‘ü’l-vesîka el-Hâc Ahmed b. el-Hâc Osman nâm kimesne mahzarında ikrâr ve takrîr-i kelâm edip benim mezbûr el-Hâc Ahmed’e cihet-i deyn-i şer‘îden iki yüz yirmi guruş zimmetimde deynim olup meblağ-ı mezbûru merkūm el-Hâc Ahmed târîh-i kitâb günü benden ba‘de’d-da‘vâ vesâtet-i [102b] muslihîn ile da‘vâ-i mezkûresinden benimle yüz yirmi guruşa sulh-ı mezbûrdan mâ‘adâsı olan yüz guruşa ve gayra müte‘allıka âmme-i da‘vâ ve kâffe-i mutâlebatdan benim zimmetimi ibrâ-i âmm-ı kātı‘ü’n-nizâ‘la ibrâ ve iskāt eyledi ben dahi deyn-i mezbûr mukābelesinde mecmû‘u üç yüz guruş kıymeti beş miskāl inci ve doksan dokuz buçuk dirhem üç çift altın bilezik ve bir çift zümrüd küpemi mezbûr el-Hâc Ahmed’e rehin ve teslîm etmişidim deyü rehn-i mezkûreyi el-Hâc Ahmed’den taleb ve da‘vâ sadedinde olmuş idim el-hâletü hâzihi da‘vâ-i mezkûrumda ben mübtıl olmağla da‘vâ-i mezkûrumdan fâriğ olup rehin-i mezkûreye ve vazîfem olmak üzere mezbûrdan iddi‘a eylediğim yüz guruş beynimizde ma‘lûm ücrete ve bundan akdem vefât eden zevcem Havva bt. el-Hâc Osman’ın cemî‘ terekesine târîh-i kitâba gelince sâir beynimizde cereyân eden ahz u i‘tâ ve mu‘amelât-ı şettâ ve hukūk-ı ma‘lûme ve mechûleye müte‘allıka âmme-i da‘vâ ve kâffe-i mutâlebâtdan mezbûr el-Hâc Ahmed’in zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim, lâkin bedel-i sulh-ı mezbûru benim merkūma def‘aten edâya iktidârım olmayıp taksît ve tecîle tâlib olduğumda ol dahi her otuz gün tamâmında kendüye ikişer guruş verip meblağ-ı mezbûru târîh-i kitâbdan cem‘an bin sekiz yüz gün tamâmına değin kendüye tamâmen edâ ve teslîm etmek üzere beni taksît ve tecîl etdikde ben dahi taksît ve tecîl-i mezbûru kabûl eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi aşere min-Cemâziyelâhir li-sene sitte aşere ve mi’e ve elf. Şuhûdü’l-hâl: eş-Şeyh Mustafa Efendi, Mehmed Efendi b. İbrahim, İbrahim Beşe el-mübâşir, Hüseyin Çelebi b. Hasan, Ali odabaşı b. Ahmed, Mehmed b. Mustafa, Mehmed Çelebi b. el-Hâc Mustafa, İmam Yusuf b. Abdullah el-Konevî.