Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 420 Hüküm no: 426 Orijinal metin no: [102b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dazkırı’ya tabi bazı köyler ahalileri ile tahsildar Ali Ağa arasındaki davada anlaşma sağlanması Vilâyet-i Anadolu’da Dazkırı kazâsına tâbi‘ Sarıkavak nâm karye ahâlîsinden Ahmed b. Hüseyin ve Avcılar nâm karyeden el-Hâc Süleyman b. Ali ve Başmakçılı nâm karyeden el-Hâc Bugay b. Veli ve Apa nâm karyeden Ahmed b. Mustafa nâm kimesneler mahmiye-i İstanbul’da meclis-i şer‘de râfi‘ü’l-vesîka Ali Ağa b. Mahmud nâm kimesne tarafından husûs-ı âti’l-beyana vekîl-i şer‘î olan el-Hâc Mustafa b. Ahmed nâm kimesne mahzarında her biri ikrâr ve takrîr-i kelâm edip müvekkil-i mezbûr Ali Ağa bin yüz on altı senesine mahsûb olmak üzere kazâmız ahâlîleri üzerlerine edâsı lâzım gelen menzil-i avârız teklîfine bâ-fermân-ı âlî memûr olmağla kazâ-i mezbûrun elli üç hânesi olup ve bizler kazâ-i mezbûrun maslahatgüzârlarından olmağla ber-mûceb-i fermân-ı âlî beher hâneye kesr-i guruş ile on birer guruş isâbet etmiş iken müvekkil-i mezbûr Ali Ağa zikr olunan elli üç hânenin beher hânesine üçer guruşdan cem‘an yüz elli dokuz guruşumuzu fermân-ı âlîden ziyâde bi-gayrı hakkın ahz u kabz ve istihlâk etmekle biz dahi meblağ-ı mezbûru müvekkil-i mezbûrdan taleb ve da‘vâ sadedinde olduğumuzda beynimizde münâza‘ât-ı kesîre vâki‘ olmuş idi. El-hâletü hâzihi beynimize muslihûn tavassut edip da‘vâ-i mezbûremizden [103a] bizi müvekkil-i mezbûr ile yirmi guruş üzerine sulh eylediklerinde biz dahi sulh-ı mezbûru kabûl ve bedel-i sulh olan meblağ-ı mezbûru yedinden ba‘de’l-ahz ve’l-kabz mâ‘adâsına müte‘allıka âmme-i da‘vâdan müvekkil-i mezbûrun zimmetini ibrâ ve iskāt eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-Cemâziyelâhire li-sene sitte aşere ve mi’e ve elf. Şuhûdü’l-hâl: Mehmed Çavuş el-mübâşir, İsmail Efendi b. Ali, Ömer Efendi, el-Hâc Yusuf b. Osman.