Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 421 Hüküm no: 427 Orijinal metin no: [103a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da vefat eden Kırımlı Muhammmed’in kölesi’nin, vasisi Nur Muhammed’e teslimi Özbek tâifesinden olup vilâyet-i Kırım’dan Taman kazâsına tâbi‘ Kayılı nâm karye ahâlîsinde olup hacc-ı şerîf tekarrübüyle mahmiye-i İstanbul’da Kilid Hanı’nda müsâfiren sâkin iken bundan akdem fevt olan el-Hâc Muhammed b. Dost Muhammed b. Muhammed’in ber-vech-i âtî vasiyy-i muhtârı olduğunu iddi‘â eden işbu râfi‘ü’l-vesîka Nur Muhammed b. Abdullah mahmiye-i mezbûrede meclis-i şer‘de müteveffâ-yı mezbûrun vasfı âtî[de zikr olunan] abd-i memlûküne vâzı‘ü’l-yed olan esirciler çavuşu el-Hâc Ahmed b. Rıdvan mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Muhammed hayâtında karye-i mezbûrda hacc-ı şerîfe âzim olduğu hâlde bi-emrillâhi te‘âlâ vefât eylediğimde yanımda mevcûd olan terekemi ahz u kabz ve semen-i misilleri ile bey‘ ve semeninden yevm-i vefâtımda kadr-ı mesnûn levâzım-ı techîz [ve] tekfînim görüp fazla kalan malımı vâriselerim olup karye-i merkūmede sâkin olan sulbiye kızlarım Gence ve Kurukız? nâm hatunlara îsâl eyleye deyü huzûr-ı Müslimînde vasiyet ve tenfîzine beni vasiyy-i muhtâr nasb ve ihtiyâr edip ben dahi vesâyet-i merkūmeyi bade’l-kabûl ma‘an mahmiye-i mezbûreye geldiğimizde mezbûr el-Hâc Muhammed hasta ve sâhib-i firâş olmağla abd-i memlûkü işbu hâzır bi’l-meclis açık kaşlı elâ gözlü Rusiyyü’l-asl Çora Muhammed’i bey‘ etdirmek için benimle işbu mezbûr el-Hâc Ahmed’e irsâl ben dahi mevsûf-ı merkūmu mezbûr el-Hâc Ahmed’e def‘ ü teslîm etmişidim, hâlâ gulâm-ı merkūmu kable’l-bey‘ mezbûr Muhammed musırran alâ-îsâihî fevt olmağın vesâyetim hasebiyle gulâm-ı merkūmu mezbûr el-Hâc Ahmed’den taleb eylediğimde bana teslîmden [imtinâ‘] eder suâl olunup alıverilmek matlûbumdur, dedikde gıbbe’s-suâl mezbûr el-Hâc Ahmed cevâbında fi’l-vâki‘ mevsûf-ı mezbûra ber-vech-i muharrer vaz‘-ı yedini ikrâr lâkin müdde‘î-i mezbûrun ber-vech-i muharrer vesâyeti ma‘lûmum değildir deyü inkâr etmeğin merkūm Nur Muhammed’den müdde‘âsına beyyine taleb olundukda udûl-i Müslimînden ve karye-i mezbûre ahâlîsinden el-Hâc Han Muhammed b. Şah Timur ve diğer el-Hâc Muhammed b. Pîrvak li-ecli’ş-şehâde meclis-i şer‘de hâzırân olup isre’l-istişhâd fi’l-vâki‘ müteveffâ-yı mezbûr el-Hâc Muhammed b. Dos Muhammed b. Muhammed hayâtında karye-i mezbûrda hacc-ı şerîfe âzim olduğu hâlde bi-emrillâhi te‘âlâ vefât eylediğimde yanımda mevcûd olan terekemi ahz u kabz ve semen-i misilleri ile bey‘ ve semeninden yevm-i vefâtımda kadr-ı mesnûn levâzım-ı techîz ve tekfînim görüp fazla kalan malımı vâriselerim olup karye-i merkūmede sâkin olan sulbiye kızlarım Gence ve Kurukız? nâm hatunlara îsâl eyleye deyü bizim huzûrumuzda vasiyet ve tenfîzine işbu müdde‘î-i mezbûr Nur Muhammed’i vasiyy-i muhtâr nasb ve ihtiyâr edip ol dahi vesâyet-i merkūmeyi ba‘de’l-kabûl mezbûr el-Hâc Muhammed musırran alâ-îsâihî fevt oldu, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye etdikde ba‘de’t-ta‘dîl ve’t-tezkiye şehâdetleri makbûle olmağın mûcibince müdde‘î-i mezbûr Nur Muhammed’in vesâyetine ba‘de’l-hükm gulâm-ı mevsûf-ı mezbûru müdde‘î-i mezbûre def‘ ve teslîme mezbûr el-Hâc Ahmed’e tenbîh olunup mâ-vaka‘a bi’t-taleb ketb olundu. Fi’l-yevmi’s-sâdis aşere min-Cemâziyelâhire li-sene sitte aşere ve mi’e ve elf. Şuhûdü’l-hâl: el-Hâc Mehmed b. el-Hâc Süleyman, Ahmed b. Mehmed, Halil Çelebi b. İbrahim, Ali Efendi b. Ahmed, el-Hâc Mehmed Efendi b. Ahmed, İsmail Efendi el-kādı, Ömer Efendi el-kādı, el-Hâc Yusuf b. Osman.