Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 422 Hüküm no: 428 Orijinal metin no: [103b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bağdatlı İbrahim Ağa’nın kasaphane kirasından dolayı Mehmed Odabaşı aleyhindeki davasında anlaşma sağlanması Bâ-imzâ-i Hazret Efendi Medîne-i Bağdad-ı Behişt-âbâd ahâlîsinden olup mahmiye-i İstanbul’da Mahmudpaşa Câmi‘i kurbünde müsâfiren sâkin İbrahim Ağa b. Ali nâm kimesne mahmiye-i mezbûrede meclis-i şer‘de işbu râfi‘ü’l-vesîka Mehmed odabaşı b. Abdullah nâm kimesne manzarında ikrâr ve takrîr-i kelâm edip medîne-i mezbûrda İmam Ali kasabasında vâki‘ merhûm Ali Evkāfı musakkafâtından olup bin yüz on dört senesinde taht-ı iltizâmımda olan ma‘lûmü’l-hudûd kasabhâneyi sene-i mezbûre Saferi’l-hayri gurresinden iki yüz on gün tamâmına değin yüz altmış guruşa ben mezbûr Mehmed Odabaşı’ya icâr ve mahâllinde teslîm ol dahi isticâr ve tesellüm ve kâmil yedi ay mârrü’z-zikr kasabhâneyi mezbûr Mehmed Odabaşı zabt eylediğinden sonra zikri mürûr eden kasabhânenin müddet-i mezkûrede icâresi olan meblağ-ı mezbûrun altmış guruşunu mukaddemâ mezbûr Mehmed Odabaşı bana edâ ve teslîm ben dahi yedinden ahz u kabz edip yüz guruşu bâkī kalmağla meblağ-ı bâkī-i mezbûru merkūm odabaşıdan taleb ve da‘vâ eylediğimde beynimizde münâza‘ât-ı kesîre ve muhâsamât-ı şedîde cereyân etmişidi, el-hâletü hâzihi beynimize muslihûn tavassut edip da‘vâ-i mezkûrumdan beni merkūm odabaşı ile yetmiş guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yetmiş guruşu merkūm yedinden tamâmen ba‘de’l-ahz ve’l-kabûl husûs-ı mezkûra müte‘allıka âmme-i da‘vâ ve kâffe-i mutâlebâtdan ben mezbûr odabaşının zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim ol dahi mukaddemâ ber-vech-i muharrer medfû‘u olan altmış guruşa ve hâlâ bedel deyü bana medfû‘u olan meblağ-ı mezbûr yetmiş guruşuna müte‘allıka da‘vâdan benim zimmetimi ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis aşere min-Cemâziyelâhire li-sene sitte aşere ve mi’ete ve elf. Şuhûdü’l-hâl: el-Hâc Mehmed b. Oruc, Süleyman Çelebi b. Abdullah, Mustafa Çelebi b. Oruç, Mehmed Çelebi b. Muslı, Mustafa Beşe b. Mustafa, Ali Çavuş b. Yusuf, Ömer Çavuş b. Mehmed.