Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 423 Hüküm no: 429 Orijinal metin no: [103b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Murtaza Efendi’nin vefat eden Oflu Ahmed Beşe’nin vasisi olduğunun tescili ve alacaklarını tahsili Vilâyet-i Anadolu’da Trabzon sancağında Of kazâsına tâbi‘ Baçan nâm karye Musa mahâllesi ahâlîsinden olup mahrûse-i Bursa’da Muradiye Medresesinde müsâferet vechi üzere sâkin iken bundan akdem vefât eden Ahmed Beşe b. Mustafa b. Kasım’ın vech-i âtî üzere vesâyâsını tenfîze vasiyy-i muhtârı olduğunu iddi‘â eden bâ‘isü’l-kitâb Murtaza Efendi b. Kâmil nâm kimesne mahmiye-i İstanbul’da meclis-i şer‘-i hatîrde Ahmed b. Mustafa ve Terzi Osman b. Ahmed nâm kimesneler mahzarlarında üzerlerine da‘vâ ve takrîr-i kelâm edip müteveffâ-yı mezbûr Ahmed Beşe hastalığı hâlinde bi-emrillâhi te‘âlâ vefât eylediğimde sen vasiyy-i muhtârım olup yanımda mevcûd olan ve sâir yerlerde olan terekemi ve zimem-i nâsda olan hukūkumu kabz edip sülüs malımdan sekiz guruş techîz ve tekfîn ve levâzım-ı defne harc u sarf edip ve sekiz guruş dahi talebe-i ulûma verip ve yine sülüs malımdan on iki guruşa bir mushaf-ı şerîf alıp talebe-i ulûmdan bir müstahık kimesneye vere ve üç guruş kıymetli dört mısır hasırı iştirâ edip zikr olunan Baçan karyesinde[ki] mahâlle-i mezbûre mescid-i şerîfine döşeye ve fazla kalan terekemi karye-i mezbûrda sâkin vârislerim olan babam mezbûr Mustafa b. Kasım ile vâlidem Âişe Hatun’a îsâl ve teslîm eyle deyü vasiyet ve işbu vesâyâsını tenfîze beni vasiyy-i muhtâr nasb ve ihtiyâr, ben dahi vech-i meşrûh üzere vesâyet-i mezbûreyi ba‘de’l-kabûl mezbûr Ahmed Beşe musırran alâ-îsâihî fevt olmağla hâlâ müteveffâ-yı mezbûrun mezbûr Ahmed Beşe yedinde bi-tarîkı’l-mudârebe hakkı olan kırk guruşu ve mezbûr Osman zimmetinde cihet-i karz-ı şer‘îden hakkı olan yirmi üç guruşu vesâyetim hasebiyle mezbûrân Ahmed Beşe ve Osman’dan taleb eyledim suâl olunsun, dedikde gıbbe’s-suâl mezbûrân Ahmed ve Osman cevâblarında fi’l-hakīka müdde‘î-i [104a] mezbûrun takrîr-i meşrûhu üzere kendülerde müteveffâ-yı mezbûrun ol mikdâr hakkı olduğunu her biri ikrâr ve lâkin müdde‘î-i mezbûrun ber-minvâl-i muharrer vesâyetini inkâr etmeleriyle müdde‘î-i mezbûrdan vech-i meşrûh üzere vesâyetine beyyine taleb olundukda udûl-i Müslimînden ve talebe-i ulûmdan olup zikr olunan Muradiye Medresesi ahâlîsinden ve mahmiye-i mezbûrede Süleymaniye Medresesi’nde müsâferet vechi üzere sâkin olan Molla Ömer b. Yusuf ve Molla Mehmed b. Ömer nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka vilâyet-i mezbûrda Trabzon sancağında Of kazâsına tâbi‘ Baçan nâm karyede Musa mahâllesi ahâlîsinden olup mahmiye-i mezbûrede zikr olunan Muradiye Medresesinde müsâferet vechi üzere sâkin iken bundan akdem vefât eden Ahmed Beşe b. Mustafa b. Kasım’ın hastalığı hâlinde bi-emrillâhi te‘âlâ vefât eylediğimde sen vasiyy-i muhtârım olup yanımda mevcûd olan vesâir yerlerde olan terekemi ve zimem-i nâsda olan hukūkumu kabz edip sülüs malımdan sekiz guruş techîz ve tekfîn ve levâzım-ı defnime harc u sarf edip ve sekiz guruş dahi talebe-i ulûma verip ve yine sülüs malımdan on iki guruşa bir mushaf-ı şerîf alıp talebe-i ulûmdan bir müstahık kimesneye vere ve üç guruş kıymetli dört mısır hasırı iştirâ edip zikr olunan Baçan karyesinde mahâlle-i mezbûre mescid-i şerîfine döşe ve fazla kalan terekemi karye-i mezbûrda sâkin vârislerim olan babam Mustafa b. Kasım ile vâlidem Âişe Hatun’a îsâl ve teslîm eyle deyü vasiyet ve işbu vesâyâsını tenfîze bizim huzûrumuzda müdde‘î-i mezbûr Murtaza Efendi’yi vasiyy-i muhtâr nasb ve ihtiyâr edip müdde‘î-i mezbûr dahi vesâyet-i mezbûreyi ba‘de’l-kabûl mezbûr Ahmed Beşe musırran alâ-îsâihî vefât eyledi müdde‘î-i mezbûr için meblağayn-ı mezbûreteyn mezbûrân Ahmed ve Osman’dan bi’l-vesâye hakk-ı taleb ve ahz vardır, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcibince müdde‘î-i mezbûrun vesâyetine ba‘de’l-hükm meblağayn-ı mezbûreyni vasiyy-i mezbûra edâ ve teslîme mezbûrân Ahmed ve Osman’a tenbîh olundukdan sonra vasiyy-i mezbûr Murtaza Efendi meclis-i şer‘de merkūm Osman muvâcehesinde ikrâr ve takrîr-i kelâm edip ânifen bana edâsına tenbîh olunan meblağ-ı mezbûr yirmi üç guruşu mezbûr Osman tamâmen bana edâ ve teslîm ben dahi vesâyetim hasebiyle yedinden ahz u kabz eyledim fîmâ-ba‘d meblağ-ı merkūm yirmi üç guruşdan mezbûr Osman zimmetinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ aşere min-Cemâziyelâhir li-sene sitte aşere ve mi’e ve elf. Şuhûdü’l-hâl: Molla Mehmed b. Kasım, Ebubekir b. Kasım, Molla Ahmed b. Rasul, el-Hâc Süleyman b. Hüseyin, Molla Osman Fetvacızâde, Mahmud Beşe b. Süleyman, Ahmed Çavuş b. Hasan, Ali İsmail Beşe b. Ali, Mehmed Beşe b. Şahin.