Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 425 Hüküm no: 430 Orijinal metin no: [104a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey’in Mustafa b. Receb aleyhindeki alacak davasının reddedilmesi Hassa habbâzlarından Mehmed Bey b. Bâli nâm kimesne mahmiye-i İstanbul’da meclis-i şer‘-i hatîr-i lâzımü’t-tevkīrde vilâyet-i Anadolu’da Ulus kazâsı ahâlîsinden olup mahmiye-i mezbûrede müsâfiren sâkin işbu bâ‘isü’l-vesîka Mustafa b. Receb nâm kimesne mahzarında üzerine da‘vâ ve takrîr-i kelâm edip târîh-i kitâbdan dokuz ay mukaddem mezbûr Mustafa’ya kazâ-i mezbûr kādısı olan Hüseyin Efendi’den beynimizde ma‘lûm bir husûs için hüccet alıvermek üzere malımdan mezbûr Mustafa’ya otuz üç guruş def‘ ü teslîm ol dahi yedimden ahz u kabz eylediğinden sonra meblağ-ı mezbûru mezbûr Hüseyin Efendi’ye vermemekle hâlâ meblağ-ı mezbûru merkūm Mustafa’dan taleb ederim suâl olunsun, dedikde gıbbe’s-suâl mezbûr Mustafa cevâbında fi’l-hakīka kazıyye vech-i meşrûh üzere olduğunu ikrâr lâkin meblağ-ı mezbûru müdde‘î-i mezbûrun emri üzere merkūm Hüseyin Efendi’ye îsâl ve teslîm eyledim yedimde bir akçe ve bir habbe kalmadı deyücek mezbûr Mustafa husûs-ı mezbûrda emîn olup yemîniyle musaddık olmağla fi’l-hakīka meblağ-ı mezbûru memûr olduğu üzere Hüseyin Efendi’ye teslîm eyleyip red ve damândan üzerine bir nesne lâzım gelmediğine mezbûr Mustafa’ya yemîn teklîf olundukda ol dahi hasbe’l-mesûl yemîn billâhi’l-aliyyi’l-a‘lâ etmeğin mûcibince müdde‘î-i mezbûr Mehmed Bey bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’l-hâmis aşer min-Cumâdelâhire li-sene sitte aşere ve mi’e ve elf. Şuhûdü’l-hâl: Emin Mehmed Efendi el-kâtib, Veliyüddin Efendi el-kādı, Ömer Efendi el-kâtib, Süleyman Efendi mukayyid, Abdurrahman Bey b. Musa.