Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 425 Hüküm no: 431 Orijinal metin no: [104b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karslı Mustafa’nın Keskin İsmail Ağa’da bulunan alacağını kefilinden tahsili Vilâyet-i Anadolu’da Kars-ı Erzurum ahâlîsinden olup mahmiye-i İstanbul’da Tahtahan’da müsâfiren sâkin olan işbu râfi‘ü’l-vesîka Mustafa b. Ali nâm kimesne mahmiye-i mezbûrede meclis-i şer‘-i hatîrde Halil Ağa b. Hüseyin mahzarında üzerine da‘vâ ve takrîr-i kelâm edip gāib ani’l-meclis Keskin İsmail Ağa nâm kimesne zimmetinde cihet-i deyn-i şer‘îden dokuz yüz guruş hakkım olup meblağ-ı mezbûrun dört yüz guruşuna işbu mezbûr Halil Ağa emr u kabûlü hâviye kefâlet-i sahîha-i şer‘iyye ile kefil olmağın hâlâ meblağ-ı mezbûru kefâletine binâen mezbûr Halil Ağa’dan taleb eylediğimde bana teslîmden imtinâ‘ eder suâl olunup alıverilmek matlûbumdur dedikde gıbbe’s-suâl mezbûr Halil Ağa cevâbında fi’l-hakīka müdde‘î-i mezbûrun merkūm İsmail Ağa zimmetinde olan hakkının dört yüz guruşuna ber-vech-i muharrer kefil olduğunu ikrâr lâkin asil-i merkūm Keskin İsmail Ağa meblağ-ı mezbûr mukābelesinde medîne-i Erzurum’da Sarrâf Çesmesi mahâllesinde vâki‘ ma‘lûmü’l-hudûd bir menzil ile ma‘lûmü’l-evsâf bir gulâm ahz u kabz edip bu vechile meblağ-ı mezbûru asil-i mezbûrdan tamâmen ahz u istîfâ etmiş idi deyü def‘le mukābele etmeğin gıbbe’l-istintâk ve’l-inkâr mezbûr Halil Ağa’dan def‘-i mezkûruna beyyine taleb olundukda ityân-ı beyyineden izhâr-ı acz ile istihlâf etmeğin fi’l-vâki‘ meblağ-ı mezbûr dört yüz guruşu asil-i merkūm Keskin İsmail Ağa’dan ber-vech-i muharrer ahz u istîfâ etmediğine müdde‘î-i merkūm Mustafa’ya yemîn teklîf olundukda ol dahi alâ-vefkı’s-suâl [mesûl] yemîn billâhi’l-aliyyi’l-a‘lâ etmeğin mûcibince meblağ-ı mezbûr dört yüz guruşu müdde‘î-i merkūm Mustafa’ya edâ ve teslîme mezbûr Halil Ağa’ya tenbîh olunup mâ-hüve’l-vâki‘ bi‘t-taleb ketb [olundu]. Fi’l-yevmi’s-sâbi‘ aşere min-Cemâziyelâhire li-sene sitte aşere ve mi’e ve elf. Şuhûdü’l-hâl: Mehmed Efendi b. Ahmed el-kādı, Mehmed Efendi el-kâtib, Veliyüddin Efendi el-kādı, İslâm Çavuş b. Abdullah el-mübâşir, el-Hâc Yusuf b. Osman, Mumcu Ömer Beşe.