Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 426 Hüküm no: 432 Orijinal metin no: [104b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayburtlu Yakub’un babasına ait zeametin Mustafa Ağa’ya verilmesine itiraz etmesi Vilâyet-i Anadolu’da Bayburd-ı Erzurum ahâlîsinden olup mahmiye-i İstanbul’da Ayasofya Câmi‘-i şerîf kurbünde müsâfiren sâkin Yakub Bey b. Süleyman nâm kimesne mahmiye-i mezbûrede meclis-i şer‘de işbu râfi‘ü’l-vesîka Mustafa Ağa b. Hüseyin nâm kimesne mahzarında ikrâr ve takrîr-i kelâm edip bundan akdem fevt olan babam mezbûr Süleyman Bey’in hayâtında kazâ-i mezbûre nâhiyesinde Hart ze‘âmeti bâ-berat-ı âlî yedinde ve taht-ı tasarrufunda iken târîh-i kitâbdan bir sene mukaddem fevt oldukda ben kazâ-i mezbûrda bulunma[ma]ğla ze‘âmet-i mezbûre merkūm Mustafa Ağa’ya tevcîh ve yedine berat-ı âlişân verilmekle mezbûr Mustafa Ağa ze‘âmet-i mezkûremi zabt ve mahsûlâtını kabz ve istihlâk eylediğinden sonra hâlâ ben gelip der-i devlete arzuhâl ve ze‘âmet-i mezkûre bi-hasebi’l-kānûn bana tevcîh ve yedime berat-ı âlişân verilmekle ber-vech-i muharrer mezbûr Mustafa Ağa’nın târîh-i kitâba gelince kabz ve istihlâk eylediği mahsûlâta müte‘allıka âmme-i da‘vâdan merkūm Mustafa’nın ve ol tarafda vekîli olan Hüseyin nâm kimesnenin defterlerini ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ aşere min-Cemâziyelâhire li-sene sitte aşere ve mi’e ve elf. Şuhûdü’l-hâl: İsmail b. Bâli, Hüseyin Ağa b. Abdullah, el-Hâc Ali Ağa b. Abdullah, Hasan Ağa b. Abdullah.