Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 427 Hüküm no: 433 Orijinal metin no: [105a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tokatlı Matuz’un eski Tokat Naibi Murtaza Efendi aleyhindeki alacak davası Fi’l-asl vilâyet-i Anadolu’da medîne-i Tokat mahâllâtından Zilli Haç mahâllesi sükkânından olup hâlâ mahmiye-i İstanbul’da Vâlide Hanı’nda müsâfiren sâkin olan Matuz v. Masar nâm zimmî mahmiye-i İstanbul’da meclis-i şer‘-i hatîr-i lâzimü’t-tevkīrde yine mahmiye-i mezbûrede Yeniodalar kurbünde sâkin Anadolu kuzâtından işbu bâ‘isü’l-vesîka fahrü’l-kuzât Murtaza Efendi b. el-Hâc Kasım mahzarında ikrâr-ı tam ve takrîr-i kelâm edip işbu mezbûr Murtaza Efendi târîh-i kitâbdan sekiz sene mukaddem medîne-i Tokat’da nâib olduğu hâlde bir husûs için bi-gayrı hakkın hazînedârı işbu hâzır bi’l-meclis es-Seyyid Hasan Çelebi yediyle mecmû‘u dört yüz otuz guruş kıymetli bir elmas yüzük ve bir sîm sâ‘at ve sekiz zirâ‘ çuka ve yüz yetmiş guruşumu ahz u kabz etmekle hâlâ eşyâ-i mezkûre mevcûd ise aynlarını müstehlek ise kıymet-i şer‘iyyelerini mezbûr Murtaza Efendi’den taleb ve da‘vâ eylediğimde ol dahi inkâr etmeğin beynimizde münâza‘ât-ı kesîre vâkı‘a olup müdde‘âmı isbât sadedinde iken beynimize muslihûn tavassut edip da‘vâ-i mezkûremden beni mezbûr Murtaza Efendi ile altmış kıt‘a esedî guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı merkūm altmış guruşu yedinden tamâmen ahz u kabz edip husûs-ı mezkûra müte‘allıka âmme-i da‘vâ ve mutâlebât ve eymân ve muhâsamâtdan mezbûr Murtaza Efendi ile hazînedârı işbu mezbûr es-Seyyid Hasan Çelebi’nin zimmetlerini ibrâ-i âmm-ı kātı‘ü’n-nizâ‘la ibrâ ve iskāt eyledim, dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin aşere min-Cemâziyelâhire li-sene sitte aşere ve mi’e ve elf. Şuhûdü’l-hâl: es-Seyyid Ali Çelebi b. Mehmed, Mehmed Çelebi b. Mustafa yorgancı, Mustafa b. Ali, Mustafa b. İsmail.