Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 427 Hüküm no: 434 Orijinal metin no: [105a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alaiyeli Mustafa Beşe’nin İstanbul Gümrüğü mukataasından vazifesi olan paranın vekili vasıtasıyla ödenmesi Vilâyet-i Anadolu’da medîne-i Alâiye ahâlîsinden olup mahrûse-i Galata’da müsâfiren sâkin Mustafa Beşe b. Mehmed nâm kimesne mahmiye-i İstanbul’da meclis-i şer‘-i enverde işbu bâ‘isü’l-kitâb el-Hâc Hasan b. Mustafa mahzarında ikrâr ve takrîr-i kelâm edip ben İstanbul Gümrüğü mukāta‘âsı malından almak üzere berat-ı âlişân ile mutasarrıf olduğum yevmî on beş akçe vazîfemi mukāta‘a-i mezbûr malından ahz u kabza ve bana îsâle tarafımdan işbu mezbûr el-Hâc Hasan’ı vekîl etmekle ol dahi vekâlet-i mezbûremi ba‘de’l-kabûl iki senede emîn olanlardan bi’l-vekâle makbûzu olan seksen altı guruşun mezbûr el-Hâc Hasan bundan akdem yetmiş guruşunu bana def‘ ü teslîm ben dahi ahz u kabz edip on altı guruşu henüz yedinde bâkī kalmış idi, el-hâletü hâzihi meblağ-ı bâkī-i mezbûr on altı guruşun on guruşunu dahi mezbûr el-Hâc Hasan yedinden ahz u kabz edip bâkī altı guruşa ve vazîfeme müte‘allıka âmme-i da‘vâdan mezbûr el-Hâc Hasan’ın zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin min-Cemâziyelâhire [105b] li-sene sitte aşere ve mi’e ve elf. Şuhûdü’l-hâl: İbrahim Çavuş b. Mehmed, el-Hâc Ali Efendi el-kādı, el-Hâc Mehmed Efendi el-kādı, Veliyüddin Efendi el-kādı, Mehmed Emin Efendi el-kādı, el-Hâc Yusuf b. Osman, Mustafa Çelebi b. Ali ve gayruhum mine’l-hâzırîn.