Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 428 Hüküm no: 435 Orijinal metin no: [105b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Markos v. Serkis tarafından bazı mülklerinin zabt edildiğine dair Karahisar-ı şarki ahalisinden Hüma bt. Ali’nin davası Vilâyet-i Anadolu’da Karahisar-ı şarkī kazâsına tâbi‘ Mişkinas nâm karye sâkinelerinden olup mahmiye-i İstanbul’da Bâlî Paşa Çeşmesi kurbünde müsâferet vechi üzere sâkine olan bâ‘isetü’l-vesîka Hümâ bt. Ali nâm hatun mahmiye-i mezbûrede meclis-i şer‘-i hatîr-i lâzimü’t-tevkīrde karye-i mezbûre ahâlîsinden Markos v. Serkis nâm Ermeni muvâcehesinde üzerine da‘vâ ve takrîr-i kelâm edip mezbûr Markos benim karye-i mezbûrda vâki‘ bir tarafdan Ağa harmanı ve bir tarafdan Minas’ın tarlası ve bir tarafdan nehr-i cârî ve bir tarafdan kendi menzilim ile mahdûd eşcâr-ı müsmire ve gayri müsmireli iki kıt‘a mülk bahçemi ve yine karye-i mezbûrda vâki‘ bir tarafdan kendi harman yerim ve bir tarafdan Semercioğlu harmanı ve bir tarafdan Hasan Ağa harmanı ve bir tarafdan ova ile mahdûd Mezarlı harman demekle ma‘rûf harman yerimi bi-gayrı hakkın zabt ve tasarruf eder mezbûr Markos’a suâl olunup takrîri tahrîr ve kasr-ı yedine tenbîh olunmak matlûbumdur dedikde gıbbe’s-suâl mezbûr Markos cevâbında fi’l-vâki‘ zikr olunan bahçelerde ve harman yerinde benim vechen mine’l-vücûh alâka ve medhalim olmayıp mezbûre Hümâ Hatun’un mülkü ve hakk-ı sarîhidir her birini mahâllerinde dilediği gibi mutasarrıfe olsun dedikde gıbbe’t-tasdîkı’ş-şer‘î mâ-hüve’l-vâki‘ bi‘t-taleb ketb olundu. Fi’l-yevmi’s-sâbi‘ aşer min-Cemâziyelâhire li-sene sitte aşere ve mi’e ve elf. Şuhûdü’l-hâl: Hasan Ağa b. Yakub, el-Hâc Mehmed b. Abdullah, Bektaş b. Hasan, Halil b. Ali, Hasan Beşe b. Ahmed, ve gayruhum mine’l-hâzırîn.