Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 428 Hüküm no: 436 Orijinal metin no: [105b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayburtlu Yakub’un babasına ait zeameti hakkında Mustafa Ağa ile davası Zü‘amâdan vilâyet-i Anadolu’da Erzurum sancağında Bayburd nâhiyesi ahâlîsinden Yakub b. Süleyman nâm kimesne mahmiye-i İstanbul’da meclis-i şer‘-i hatîrde hâlâ sadrıâzam-ı efham hazretlerinin enderûn ağalarından Zurnezân Mustafa Ağa b. Hüseyin tarafından husûs-ı âti’l-beyana vekîl olduğu İsmail Ağa b. Bâlî ve Ali Bey b. Abdullah nâm kimesneler şehâdetleriyle şer‘an vekâleti sâbit olan bâ‘isü’l-kitâb Mustafa Efendi b. Ahmed nâm kimesne mahzarında ikrâr ve takrîr-i kelâm edip nâhiye-i mezbûrda vâki‘ Hart ve gayriden yirmi üç bin akçe ze‘âmete berat-ı âlişan ile babam müteveffâ-yı mezbûr Süleyman’ın üzerinde iken bi-emrillâhi te‘âlâ babam mezbûr Süleyman fevt oldukda mahlûlünden müvekkil-i mezbûr Mustafa Ağa’ya beş bin akçe terakkī ile tevcîh olunup yedine berat-ı âlişan ihsân olundukdan sonra ben gelip babam müteveffâ-yı mezbûrun mahlûlünden Dîvân-ı âlî’ye arzuhâl eylediğimde merhameten ze‘âmet-i mezkûre terakkīsi ile babam müteveffâ-yı mezbûr mahlûlünden ve müvekkil-i mezbûr ref‘inden bana tevcîh ve inâyet olunup yedime berat-ı âlişân ihsân olunmağla bi’t-terâzî müvekkil-i mezbûr Mustafa Ağa dahi yedinde olan berat-ı âlişânı bana verip ben dahi teberru‘an malımdan iki yüz guruş müvekkil-i mezbûr Mustafa Ağa’ya def‘ ü teslîm ol dahi yedimden ahz u kabz edip husûs-ı mezbûra müte‘allıka âmme-i da‘vâdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik fîmâ-ba‘d birbirimiz ile meblağ-ı mezbûra ve husûsu-ı mezbûra ve sâire müte‘allıka aslâ da‘vâ ve nizâ‘ ve husûmetimiz kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ aşere min-Cemâziyelâhir li-sene sitte aşere ve mi’e ve elf. Şuhûdü’l-hâl: el-Hâc Ali Ağa b. Abdullah silahdâr, Hüseyin Ağa b. Abdullah, Ali Ağa kapucı, İsmail Ağa b. Nasır?, Ali Bey b. Abdullah.