Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 431 Hüküm no: 439 Orijinal metin no: [106b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Abdullah’ın, Abdullah b. Süleyman tarafından darp edilip yaralandığı iddiasında sulh olduğu Mahmiye-i İstanbul’da Camcı Ali mahâllesinde sâkin Hasan b. Abdullah nâm şâbb-ı emred mahmiye-i mezbûrede meclis-i şer‘-i hatîrde işbu râfi‘ü’l-vesîka Sarrâc Abdullah b. Süleyman nâm kimesne mahzarında ikrâr-ı tam ve takrîr-i kelâm edip mezbûr Abdullah bundan akdem mahmiye-i mezbûrede Sarachane içinde bıçak ile beni sol küreğim üzerinden amden darb ve cerh etmekle mucibini mezbûr Abdullah’dan talep ve da‘vâ eylediğimde ol dahi sen mukaddemâ husûs-ı mezbûru benden taleb ve da‘vâ ve lede’l-iktizâ sulh ve ibrâya vâliden işbu hâzıratü bi’l-meclis Fâtıma bt. Abdullah nâm hatunu tarafından vekîl edip ol dahi da‘vâ-i mezkûreden benimle on sekiz guruş bedel-i makbûza sulh olup cerh-i mezbûrun mûcibine ve mâ-yehdesü mihhuya müte‘allıka da‘vâdan bi’l-vekâle zimmetimi ibrâ ve iskāt etmişidi deyü def‘le mukābele ve mazmûnu takrîrine mutâbık bir kıt‘a hüccet ibrâz etdikde ben mazmûn-ı hücceti bi’l-külliye inkâr etmeğin mezbûr Abdullah vesâtet-i muslihîn ile da‘vâ-i mezkûrumdan beni beş guruş üzerine sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûr beş guruşu merkūm Abdullah yedinden ahz u kabz edip ba‘de’l-yevm harc-ı mezbûrun mûcibine ve mâ-yehdesü minhuya müte‘allıka âmme-i da‘vâdan mezbûr Abdullah’ın zimmetini ibrâ-i âmm-ı râfiü’l-hısâm ile ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ aşere min-Cemâziyelâhire li-sene sitte aşere ve mi’e ve elf. Şuhûdü’l-hâl: Mehmed Efendi b. Ahmed el-kādı, Osman Efendi b. kâtib, Mustafa Çelebi b. Himmet, İbrahim Çavuş b. Hüseyin, el-Hâc Yusuf b. Osman.