Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 431 Hüküm no: 440 Orijinal metin no: [106b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un müteveffa kocasının terekesinden kendine ait mehr-i müeccelin verilmesine dair oğlu Abdullah’a açmış olduğu dava Medîne-i Galata muzâfâtından kasaba-i Beşiktaş’da Sinanpaşa mahâllesinde sâkin iken bundan akdem fevt olan Mehmed Kapudan b. Mehmed’in verâseti zevce-i menkûha-i metrûkesi Âişe Hatun bt. Hasan ile sulbî kebîr oğulları Abdullah ve İbrahim ve Ali ve Ahmed’e ve sulbiye kebîre kızı Saliha nâm Hatun’a münhasıra olduğu lede’ş-şer‘ zâhir ve mütehakkık oldukdan sonra işbu râfi‘ü’l-vesîka mezbûre Âişe hatun mahmiye-i İstanbul’da meclis-i şer‘de müteveffâ-yı mezbûr’un vasiyy-i muhtârı olmağla terekesine bi’l-verâse ve bi’l-vesâyâ vâzı‘ü’l-yed olan mezbûr Abdullah mahzarında üzerine da‘vâ ve takrîr-i kelâm edip zevcim müteveffâ-yı mezbûr Mehmed Kapudan zimmetinde mütekarrir ve ma‘kūdün-aleyh yüz guruş mehr-i müeccelim olup meblağ-ı mezbûru bana kable’l-ahz fevt olmağın terekesinden mezbûr Abdullah’dan taleb eylediğimde edâdan imtinâ‘ eder, suâl olunup alıverilmek matlûbumdur, dedikde gıbbe’s-suâl mezbûr Abdullah cevâbında fi’l-vâki‘ müdde‘iye-i mezbûrenin zevci müteveffâ-yı mezbûr Mehmed Kapudan zimmetinde mütekarrir ve ma‘kūdün-aleyh yüz guruş mehr-i müecceli olduğunu ikrâr ve i‘tirâf etmeğin mûcibince meblağ-ı mezbûr yüz guruşu tereke-i müteveffâ-yı mezbûrdan müdde‘iye-i mezbûreye edâ ve teslîmi [107a] mezbûr Abdullah’a tenbîh olunup mâ-vaka‘a bi’t-taleb ketb olundu. Fi’l-yevmi’s-sâbi‘ aşere min-Cemâziyelâhire li-sene sitte aşere ve mi’e ve elf. Şuhûdü’l-hâl: Ali Efendi b. Mehmed, el-Hâc Mehmed Efendi b. Ahmed, İsmail Efendi el-kādı, Ömer Efendi el-kâtib, Mehmed Efendi el-kādı, el-Hâc Yusuf b. Osman.